Zati aliləri! Azərbaycan Yüksəliş Partiyası olaraq, ABŞ dövlətinin və xalqının müqəddəs bayramı-Müstəqillik günü münasibəti ilə şəxsən sizi və sizin simanızda amerika xalqını təbrik edirik.

   Sonradan ABŞ-ın üçüncü prezidenti olan Tomas Ceffersonun müəllifliyi ilə Britaniyadan  azadlıq deklarasiyasının 1776-cı ilin 4 iyul tarixində  qəbul olunması, azadlıq və demokratiya epopeyasının başlanğıcı oldu. Amerika xalqının müstəqilliyə və demokratiyaya qovuşmaq yolunda göstərdiyi  əzmkarlıq, dünya xalqları üçün də presedent və təkanverici amil oldu. Xalqınızın Amerika qitəsində ilk demokratik dövlət qurması, 1918-ci ildə Şərqdə ilk demokratik respublika olan Azərbaycan Xalq Cümhuriyyətinin yaranması üçün də bir örnək oldu.

   Dünya xalqlarının azad yaşama hüquqları və müstəqillik hüquqlarının təsbit olunmasında, insanların söz azadlığı, fikir azadlığı və sərbəst toplaşma azadlığı kimi demokratik dəyərlərin, eləcə də seçmək, seçilmək, təhsil və sosial hüquqların müdafiə olunmasında ABŞ dövlətinin beynəlxalq arenada göstərdiyi xidmətlər danılmazdır.

  Dəyərli tarixi olan Amerika-Azərbaycan dostluğunun  möhkəmlənməsinə xidmət edən, müasir dövrdə həyata keçirilən enerji və sənaye sahələrindəki sıx əməkdaşlıq, xalqlarımız və dövlətlərimiz arasında qarşılıqlı etimadın göstəricisidir.

  ABŞ-ın Azərbaycanın ərazi bütövlüyünə və suverenliyinə göstərdiyi dəstəyi də yüksək qiymətləndiririk.

   Cənab prezident! 245-ci Müstəqillik gününüz  mübarək olsun.Yaşasın Demokratiya! Yaşasın ABŞ-Azərbaycan dostluğu! 

Dərin hörmət və ehtiramla, 

Azərbaycan Yüksəliş Partiyasının Başqanı 

Anar Əsədli 

4 iyul 2021-ci il 

Bakı.