Azərbaycan Yüksəliş Partiyasının başqanı Anar Əsədli Daxili işlər naziri, general-polkovnik Vilayət Eyvazova təbrik ünvanlayıb.

Təbrikdə deyilir: “Hörmətli Nazir!

Sizi 2 iyul – Azərbaycan Polisi Günü münasibətilə təbrik edirəm.

Azərbaycan Polisi yarandığı 2 iyul 1918-ci il tarixindən indiyədək şərəfli bir yol qət edib.

90-cı illərin əvvəllərində qanlı münaqişəyə cəlb olunan ölkəmizin sərhədlərinin, ərazi bütövlüyünün qorunmasında ən böyük yük Azərbaycan polisinin üzərinə düşdü. Həmin dövrdə qəhrəman polislərimiz düşmənə sinə gərdi, canları, qanları hesabına daha böyük təhdidlərin qarşısını aldılar, minlərlə polis əməkdaşı şəhid oldu, sağlamlığını itirdi.

Azərbaycan tarixinə qızıl hərflərlə yazılan 44 günlük Vətən müharibəsində əldə etdiyimiz Zəfərdə də böyük qəhrəmanlıq, şücaət göstərən polis əməkdaşlarının əvəzedilməz rolu olub.

Savaşdan sonra azad olunmuş ərazilərimizdə sabitliyin bərqərar olması, bölgənin yenidən qurulması istiqamətində orada fəaliyyət göstərən mülki şəxslərin təhlükəsizliyinin təmin edilməsində polislərimizin üzərinə böyük məsuliyyət düşür və onlar bu işin öhdəsindən layiqli şəkildə gəlirlər.

Cənab General!

Sizi bir daha təbrik edir, fəaliyyətinizdə uğurlar diləyirəm”.