Azərbaycan Yüksəliş Partiyasının (AY Partiya) Başqanı Anar Əsədli bu il ali məktəblərə qəbul olmuş bir qrup gənclə görüş keçirib.

Görüşdə İcra Aparatının rəhbəri Aqil Dadaşzadə, Başqanın müavinləri Gülşən Hacıyeva, Sevinc Fədai, Rəşad Bakuvi, Aynur Qəzənfərqızı, Vasif İsmayıl, müşavirləri Məleykə Alıoğlu, İlhamə Həkimoğlu, Sahib Altay, Gənclər Təşkilatının sədri Fuad Gülməmmədov da iştirak ediblər.

Səmimi şəraitdə keçən görüşdə gənclər öz gələcək arzu və planları barədə danışıblar. Anar Əsədli gənclərə tələbəlik illərində uğurlar arzulayaraq, onlara bir sıra məsləhət və tövsiyələrini bildirib. “Mən çox istərdim, siz dünyanın hansı  nöqtəsində olursunuzsa olun, bu vətən, bu dövlət üçün  uğurlu fərdlər olaraq yetişəsiniz. Çalışın, elə tələbəlik illərindən iş həyatına alışın, hansı işdə işləməyin fərqi yoxdur, məqsəd  təcrübə toplamaq, sosiallaşmaq olsun. Çoxlu kitablar oxuyun, amma o kitablardan öyrəndikləriniz bilgilərdə ilişib qalmayın, aldığınız bilgiləri zənginləşdirin, ölçün-biçin. İlk növbədə Azərbaycan ədəbiyyatına üz tutun, tariximizi öyrənin, bilin. Sorğulamağı bacarın. Özünüz haqqı nahaqdan ayırmağı bacarın. Mən hər birinizin uğurlu gələcəyi olacağına inanıram. AY Partiya olaraq əlimizdən gələn dəstəyi sizə verəcəyik. Qapımız hər zaman üzünüzə açıqdır”, - deyə o bildirib.
Görüşdə gənclər onları maraqlandıran müxtəlif suallar verdilər, Başqan məmnuniyyətlə bu sualları cavablandırdı.

Görüşün sonunda gənclərə partiya adından təbrik məktubları təqdim olundu, Anar Əsədlinin “Vicdanın labüd  etdiyi savaş” kitabı və yerli müəlliflərin nəşrləri hədiyyə edildi, xatirə şəkilləri çəkildi.