Mayın 5-i Azərbaycan mədəniyyətinin ən parlaq nümayəndələrindən biri olan Adil İsgəndərovun doğum günüdür.
Mili teatr və kinomuzun inkişafında danılmaz xidmətləri olan A. İsgəndərov 1910-cu ilin may ayının 5-də Gəncədə dünyaya göz açıb.
Uşaqlığından teatra, sənətə bağlı olan böyük ustad ömrünün 25 ilini Azərbaycan Dövlət Akademik Dram teatrında keçirib. Teatrda çoxsaylı tamaşalara quruluş verərək özünün "teatr məktəbi"ni yaratmağa müvəffəq olub.
A. İsgəndərov "Azərbaycanfilm" kinostudiyasına rəhbərlik etdiyi dövrdə isə milli kinomuzun inciləri olan xeyli bədii filmin çəkilməsinə nail olub. Bundan başqa, o, bir sıra filmlərdə yaddaqalan, koloritli rollar ifa edib.
Azərbaycanın mədəniyyət xadimləri arasında ilk dəfə SSRİ xalq artisti adına layiq görülən Adil İsgəndərov 1978-ci ildə vəfat edib.
Mayın 4-ü isə görkəmli teatr və kino aktyoru, lirik-psixoloji üslublu aktyorluq məktəbinin aparıcı nümayəndələrindən biri Xalq artisti Fuad Poladovun anım günüdür.
Fuad Poladov 1948-ci il may ayının 24-də Bakıda doğulub. O, Cəfər Cabbarlı adına "Azərbaycanfilm" kinostudiyasında Adil İsgəndərovun aktyorluq studiyasını bitirib. 1967–1972-ci illərdə Mirzağa Əliyev adına Azərbaycan Dövlət İncəsənət İnstitutunun dram və kino aktyorluğu fakültəsində ali təhsil alıb.
Kinoda ilk rolu 1966-cı ildə "İstintaq davam edir" filmində çəkildiyi Səlim obrazı olub. Sənət müəllimi Tofiq Kazımovun dəvəti ilə tələbə ikən İlyas Əfəndiyevin Akademik Milli Dram Teatrında hazırlanan "Məhv olmuş gündəliklər" pyesinin tamaşasında Savalan rolunu oynayıb. Bundan sonra teatrın aktyor truppasına daxil olub. Həmin vaxtdan 1989-cu ilə qədər Akademik Milli Dram Teatrında çalışıb. 1989-cu ildən Səməd Vurğun adına Azərbaycan Dövlət Rus Dram Teatrının aktyoru olub. Milli teatr və kinomuzda Azərbaycan mədəniyyəti tarixinin parlaq səhifələrini təşkil edən çoxsaylı unudulmaz obrazlar yaradıb.
Böyük sənətkar 2018-ci il mayın 4-də vəfat edib.
Azərbaycan Yüksəliş Partiyası əvəzsiz sənətkarlar Adil İsgəndərov və Fuad Poladovu sevgi ilə, əziz xatirələrini ehtiramla yad edir.
