Azərbaycan Yüksəliş Partiyasının rəhbərliyi bu gün ölkəmizdə səfərdə olan niderlandlı tədqiqatçı, Azərbaycansevər Henri Van Rens ilə təkrar bir araya gəlib.

Çay süfrəsi arxasında səmimi şəraitdə keçən görüşdə partiya Başqanı Anar Əsədli, Başqanlıq Heyətinin üzvləri Aqil Dadaşzadə, Aynur Qəzəngərqızı, Rəşad Bakuvi, Gülşən Hacıyeva iştirak ediblər. Görüşdə Azərbaycan və Niderland arasındakı münasibətlərin perspektivi, AY Partiya və Niderlandın siyasi partiyaları arasında əlaqələrin qurulması, bölgədə və dünyada gedən proseslər barədə danışılıb.

Başqan Anar Əsədli müəllifi olduğu “Vicdanına labüd etdiyi savaş” və “AY Partiyanın kitabxanası” çərçivəsində çap edilən Məhsa Mehdilinin “44 günlük savaşda Güney Azərbaycan” kitablarını qonağa təqdim edib.
Henri Van Rens AY Partiya Başqanı və təmsilçiləri ilə tanışlıqdan məmnun olduğunu dilə gətirib, partiya rəhbərliyi ilə mütəmadi əlaqə saxlayacağını vurğulayıb. O, AY Partiyanı Niderlanda dəvət edib.