AY Partiya rəhbərliyi Rəsulzadənin abidəsini, Əbülfəz Elçibəy və Heydər Əliyevin məzarlarını ziyarət edib 

Azərbaycan Yüksəliş Partiyasının rəhbərliyi bu gün Azərbaycan Xalq Cümhuriyyətinin yaranmasının 103 illiyi münasibətilə dahi öndərimiz Məhəmməd Əmin Rəsulzadənin Bakının Novxanı qəsəbəsində yerləşən abidəsini ziyarət edib.

Partiya rəhbərliyi böyük Rəsulzadəni və onun silahdaşlarını sayğı ilə yad edib, abidənin önünə əklil qoyub.

AY Partiya təmsilçiləri daha sonra Fəxri xiyabanda müstəqil Azərbaycan Respublikasının mərhum prezidentləri Əbülfəz Elçibəy və Heydər Əliyevin məzarlarını ziyarət ediblər. Hər iki prezidentin xatirəsi ehtiramla yad edilib, məzarları önünə əklil qoyulub.

Yüksəliş Partiyasının rəhbərliyi həmçinin, Bakının rus-erməni işğalından azad edilməsində canlarından keçən Türk-İslam Qafqaz Ordusunun əsgərlərin uyuduğu Türk şəhidliyini, Azərbaycanın müstəqilliyi, torpaqlarımızın bütövlüyü uğrunda canından keçmiş şəhidlərimizin məzarlarını ziyarət ediblər. 

Yüksəliş Partiyası Başqanı Anar Əsədli bildirib ki, xalqımızın, bəşəriyyətin və xüsusən də Şərq xalqlarının həyatında ən əlamətdar hadisənin- haqqı, ədaləti, hər bir insanın hüquq və azadlığını bəyan edən Cümhuriyyətimizin və eyni zamanda, Azərbaycan adlı ilk müstəqil dövlətimizin 103 yaşı qeyd olunur: “Torpaqlarımızın böyük əksəriyyətinin 30 illik işğalına son qoyuldu. Bu il Cümhuriyyət günümüzü daha geniş ərazidə qeyd edirik, bayrağımız ölkənin əksər bölgələrində dalğalanır. Bu zəfəri bizə yaşadan şəhidlərimizi sayğı ilə yad edir, qazilərimizə şəfa diləyirəm.

Başlayan hər günə, söylənən hər yeni fikrə mərhaba deyirik. Cümhuriyyət həm açıqfikirlilikdir, həm qarşılıqlı hörmətdir, həm dövlətçilk ənənəsidir. Qədim dövlətçilk ənənəsi olan bir çox ölkədə siyasi dözümlülük, qarşılıqlı hörmət müşahidə edirik. Ölkənin həyatında səhviylə, düzüylə önəmli rol oynamış, bu dövlətin var olmasında əhəmiyyətli yeri olmuş şəxsiyyətlərə sayğıyla yanaşılmalı, ideoloji fərqlərə varmadan ehtiram göstərilməlidir. Biz gənc bir dövlətik, bu 30 ildə çox siyasi mərhələdən keçdik. Amma Cümhuriyət tarixini yaxşı oxuyanlar bilir ki, qurucu böyüklərimiz nə olursa olsun, gələcəyə baxdılar, boş yerə “bir kərə yüksələn bayraq bur daha enməz” demədilər. Azərbaycan hakimiyyətinin də, müxalifətinin də, müxtəlif siyasi baxışı olan qüvvələrin də dövlətin önəmli günlərində məhz dövlət tərbiyəsinə və təfəkkürünə yaraşan bir tərzdə siyasi davranış göstərməsini arzulayırıq. Millətlərin və dövlətlərin tarixində müstəsna xidmətləri olmuş tarixi şəxslərə sayğı ilə yanaşılması, tarixi şəxslərlə bağlı siyasi speklyuasiya edilməməməsi vacibdir. Tarix önəmlidir, amma dünəndir. Dünənə sayğı göstərmək gələcəyimizə sağlam mədəni, siyasi münasibətlərin təməlini qoymaqdır!”