Bu gün görkəmli ictimai xadim, Xalq yazıçısı İsmayıl Şıxlının doğum günüdür. 

İsmayıl Qəhrəman oğlu Şıxlinski 1919-cu ilin mart ayının 22-də Qazaxda rayonunda doğulub. İkinci Dünya müharibəsində iştirak edən yazıçı daha sonra uzun illər ADPİ-da müəllim işləyib. Bir müddət Azərbaycan Yazıçılar İttifaqının katibi, 1981-1987-ci illərdə birinci katibi, Milli Məclisin deputatı olub. 

İsmayıl Şıxlı bədii yaradıcılığa 1930-cu illərin sonundan başlayıb. Bir sıra maraqlı hekayə, oçerk və romanların müəllifidir.  "Kerç sularında", "Xatirəyə dönmüş illər", Ayrılan yollar", "Ölülərinizi qəbiristanda basdırın", "Məni itirməyin" "Seçilmiş əsərləri" və başqa kitabları işıq üzü görüb. İ. Şıxlı yaradıcılığında məşhur "Dəli Kür" romanı ayrıca mərhələ təşkil edir. Əsər 20-ci əsr Azərbaycan ədəbiyyatının ən parlaq nümunələrindən biridir.  

İsmayıl Şıxlı Azərbaycanda milli şüurun oyanmasında, milli özünüdərk prosesinin formalaşmasında və milli-azadlıq hərəkatının təşəkkül tapmasında əhəmiyyətli rol oynamış böyük ziyalılardan biri olub.  

İsmayıl Şıxlı Xalq yazıçısı fəxri adına və bir sıra dövlət təltiflərinə layiq görülüb. 

O, 1995-ci ilin 26 iyulunda dünyasını dəyişib, Fəxri Xiyabanda dəfn olunub.

Azərbaycan Yüksəliş Partiyası milli ədəbiyyatımızın görkəmli nümayəndəsi, Xalq yazıçısı Ismayıl Şıxlının parlaq xatirəsini həmişə əziz tutur.