Mayın 16-da Gürcüstanda azərbaycanlıların yığcam yaşadığı Dmanisi rayonunda baş verən kütləvi dava ciddi narahatlığa səbəb olub. 

Svan etnik mənsubiyyətinə malik bir qrupun azərbaycanlılara hücumu nəticədə bir neçə nəfər xəsarət alıb. 

Artıq faktla əlaqədar Gürcüstan Daxili İşlər Nazirliyi araşdırmalara başlayıb.

Gürcüstan DİN münaqişə tərəflərini insidenti süni etnik qarşıdurmaya çevirməməyə, təmkinli olmağa çağırıb, qanun pozuntusuna yol verənlərin cəzalandırılacağını açıqlayıb. 

İnsidentin baş verdiyi ərazidə toplanan yerli azərbaycanlılar aksiya keçiriblər. Onlar azərbaycanlı sahibkara məxsus mağazaya hücum təşkil edən şəxslərin cəzalandırılmasını tələb ediblər.

Azərbaycan Yüksəliş Partiyası baş verən insidentdən narahatlığını bildirir, Gürcüstanın hüquq-mühafizə orqanlarının məsələni ədalətli və qərəzsiz şəkildə araşdıracağına, günahkarları cəzalandıracağına əminliyini ifadə edir, soydaşlarımızı ehtiyatlı olmağa, emosiyalara uymamağa, Azərbaycan hakimiyyəti və diasporunu məsələni diqqətdə saxlamağa çağırır.