İyunun 4-də xidməti vəzifələrinin icrası ilə əlaqədar işğaldan azad edilmiş Kəlbəcər rayonuna ezam olunmuş televiziya kanallarının və xəbər agentliklərinin əməkdaşlarının içərisində  olduğu sərnişin avtomobilinin rayonun Susuzluq kəndi istiqamətində tank əleyhinə minaya düşməsi nəticəsində 3 nəfər – Sirac Abışov (AzTV telekanalının operatoru), Məhərrəm İbrahimov ("Azərtac" xəbər agentliyinin əməkdaşı), Arif Əliyev (RİH başçısının Susuzluq kənd inzibati ərazi dairəsi üzrə nümayəndəsinin müavini) həlak olub, 4 nəfər isə müxtəlif dərəcəli bədən xəsarətləri almaqla xəstəxanaya yerləşdirilib.

AY Partiya bildirir ki, bu, erməni vandalların mülki Azərbaycan vətəndaşlarını hədəf alması ilə bağlı ilk fakt deyil.

İstər I Qarabağ savaşı, istərsə də 44 günlük Vətən müharibəsi, eyni zamanda atəşkəs dövründə dəfələrlə mülki şəxslər - o cümlədən uşaqlar, yaşlılar erməni terrorunun qurbanı olub. 

44 günlük müharibə ərzində erməni terrorçuları dəfələrlə peşə fəaliyyətini həyata keçirən və fərqləndirici gödəkcələrində olan jurnalistlərə atəş açıblar, nəticədə onların arasında yaralananlar da olub. Müharibənin bitməsindən bir neçə ay keçməsinə baxmayaraq, erməni terroru  davam edir.

Bu müddətdə 100-dək hərbçimiz və mülki vətəndaşımız mina partlayışının qurbanı olub. 

Təəssüf ki, Ermənistan tərəfi bütün beynəlxalq aktları pozaraq, minalanmış ərazilərin xəritəsini Azərbaycana verməməkdə, beynəlxalq ictimaiyyət isə susmaqda israr edir. Bu da gələcəkdə itkilərimizin davam edəcəyinə işarədir.

AzərbaycanYüksəliş Partiyası həlak olan şəxslərin ailə üzvlərinə, yaxınlarına, media cameəsinə, dərin hüznlə baş sağlığı verir,  beynəlxalq qurumları, xüsusilə media təşkilatlarını bu terrora səssiz qalmamağa, Ermənistanı qınamağa, mina xəritələrini təqdim etməsi üçün bu ölkəyə təzyiq göstərməyə çağırır.