Azərbaycan Yüksəliş Partiyasının Milli İstiqlal məfkurəmizin banisi, Azərbaycan Xalq Cümhuriyyətinin qurucusu Məhəmməd Əmin Rəsulzadənin ölümünün 66-cı ildönümü ilə əlaqədar anım mesajı

Azərbaycan dövlətçiliyinin yenidən şahlanmasının memarı Məhəmməd Əmin Rəsulzadə 66 il öncə dünyasını dəyişdi, yüz minlərlə azadlıq və istiqlal mübarizini lidersiz qoyub getdi. O, bu dünyadan köçəndə 71 yaşındaydı. Maraqlıdır ki, Azərbaycanda Sovet İmperiyasının işğalı da 71 il çəkdi. Rəsulzadə ölüm yaşı ilə sanki yeni nəsillərə xəbər verirdi ki, zülm ədalətdən, istibdad istiqlaldan, işğal azadlıqdan daha uzun ömürlü ola bilməz. Tarix göstərdi ki, o, haqlıydı.

Məhəmməd Əmin sadəcə Qafqaz və Rusiya Türklərinə deyil, ümumilikdə əzilən bütün xalqlara istiqlaliyyətin və hürriyətin əldə edilməsinin düsturunu miras qoyub. 

Azərbaycanın müasir tarixində Rəsulzadəni dərindən və doğru yöndə anlayan insan sayı az deyil. Bu gün Rəsulzadənin xatırlanması, ürəklərdə yaşaması həmin insanların sayəsində mümkün olub. 

 AY Partiyanın hər bir üzvü bu gün başda Rəsulzadə olmaqla, Azərbaycan insanına hürriyəti daddıran dünyasını dəyişmiş bütün mübarizə liderlərini ehtiramla yad edir, hər birinə Tanrıdan rəhmət diləyir.

 Azərbaycan heç vaxt Sizi unutmayacaq, Böyük Öndər!