Gənc yaşında sovet rejimin repressiyasına məruz qalaraq, həyatla vidalaşan şair Mikayıl Müşfiqin doğum günüdür. 

Mikayıl Mirzə Əbdülqadir oğlu İsmayılzadə (Mikayıl Müşfiq) 1908-ci il iyun ayının 5-də anadan olub. 

Uşaq ikən valideynlərini itirən Müşfiq yaxın qohumlarının himayəsində böyüyür. Ağır və fərəhsiz uşaqlıq keçirən şair məşhur "Ana" şeirini də ürək yanğısı ilə qələmə alır. 

İbtidai təhsilini rus-Azərbaycan məktəbində alan Müşfiq humanitar elmlərə böyük maraq göstərməklə yanaşı, rus dilini də mükəmməl öyrənir. 

Cəmi 29 illik ömrünə çox şeyi sığdıran şair  həqiqi  müəllim, əsl vətənpərvər olmaqla yanaşı, yaradıcılığında uşaqlar üçün də yer ayırır, bir-birindən gözəl əsərlər yaradır. O, həmçinin bədii tərcümə fəaliyyəti ilə məşğul olur, klassiklərin əsərlərini dilimizə çevirir.

1937-ci il repressiyaları Azərbaycan ədəbiyyatının, mədəniyyətinin görkəmli siması Mikayıl Müşfiqdən də yan keçmir. 

Müsavat gənclər təşkilatı ilə əlaqə saхlamaqda, partiya və hökumətin ünvanına böhtanlar deməkdə ittiham olunaraq,  1937-ci il iyun ayının 4-də isə evində həbs edilir. 1938-ci il yanvar ayının 5-də SSRİ Ali Məhkəməsinin 20 dəqiqəlik məhkəmə iclası Müşfiq barəsində güllələnmə qərarı verir. Hökm yanvarın 6-da Nargin adasında yerinə yetirilir.

Mikayıl Müşfiq ölümündən xeyli keçəndən  sonra bəraət alır.

Azərbaycan Yüksəliş Partiyası böyük şairimizi,  istər çar, istər bolşevik, istər sovet Rusiyasının, istərsə də onların varisi olan Rusiya Federasiyasının repressiyalarının, terrorunun  qurbanı olan bütün soydaşlarımızı dərin ehtiramla yad edir.