Azərbaycan Yüksəliş Partiyasının böyük mütəfəkkir Mirzə Fətəli Axundzadənin anım günü ilə əlaqədar mesajı
Martın 10-u böyük mütəfəkkir Mirzə Fətəli Axundzadənin anım günüdür.
Azərbaycan yazıçısı, maarifçisi, şairi, filosofu, ictimai xadimi; Azərbaycan dramaturgiyası və ədəbi tənqidin banisi, "müsəlman Molyeri" adı ilə tanınan Mirzə Fətəli Axundzadə 1812-ci ildə anadan olub.
13 yaşınadək ailəsi ilə birlikdə Cənubi Azərbaycanın müxtəlif bölgələrində yaşayan Mirzə Fətəli 1825-ci ildə anası ilə Şəkiyə qayıdır. Fətəlinin ruhani olmasını istəyən anasının əmisi Axund Hacı Ələsgər 1832-ci ildə onu Gəncəyə aparır. Gənc Fətəli burada məntiq və fiqh elmlərini, dahi Azərbaycan şair və filosofu Mirzə Şəfi Vazehdən xəttatlıq sənətini öyrənir. Lakin Mirzə Şəfinin gənc Fətəliyə təsiri bununla bitmir. Bu görüş Mirzə Fətəlinin həyat və yaradıcılığına, ümumiyyətlə, onun bir mütəfəkkir kimi formalaşmasına ciddi təsir göstərir.
Dövrünün müasir elmləri ilə maraqlanan Fətəli 1833-cü ildə Şəkidə açılan rus məktəbinə daxil olur və bir il burada təhsil alır. 1834-cü ildə o, Tiflisə gedir, Qafqaz canişininin baş dəftərxanasında mülki işlər sahəsində Şərq dilləri mütərcimi təyin olunur və ömrünün sonuna qədər bu vəzifədə çalışır. 1873-cü ildə ona polkovnik hərbi rütbəsi yiyələnir.
Mirzə Fətəli Axundzadə 1878-ci il martın 10-da Tiflisdə vəfat edib və köhnə müsəlman qəbiristanlığında (indiki Tbilisi botanika bağının ərazisində yerləşən Görkəmli Azərbaycanlılar panteonu) dəfn olunur.
M. F. Axundzadə 1850-1855-ci illərdə altı komediya yazmaqla tək ədəbiyyatımızda deyil, bütün müsəlman Şərqində dramaturgiyanın əsasını qoyub.
M.F.Axundzadənin ən böyük arzularından biri ərəb əlifbasını dəyişdirmək idi.
Azərbaycan Yüksəliş Partiyası dahi mütəfəkkiri sayğı ilə anır.