Məlum olduğu kimi, Bakının Binəqədi Rayon Məhkəməsi Baş Prokurorluğun İstintaq İdarəsinin təqdimatını təmin edərək, jurnalist Əvəz Zeynallı və vəkil Elçin Sadıqov barəsində 4 ay müddətinə həbs qətimkan tədbiri seçib.
Əvəz Zeynallıya Cinayət Məcəlləsinin 311.3.3-cü (külli miqdarda rüşvət alma), Elçin Sadıqova 311, 32.5-ci (rüşvət almağa köməklik) maddəsi ilə ittiham irəli sürülüb.
Hər iki şəxs prokurorluğun xəbərlərə və mediaya əsaslanaraq, cinayət təqibi başladığını, işdə konkret şikayətçinin olmadığını bildirməklə ittihamları rədd edir, cinayət təqibini peşə fəaliyyətləri ilə əlaqələndirir.
Azərbaycan Yüksəliş Partiyası jurnalist və vəkil barəsində qəbul edilmiş məhkəmə qərarını həddən artıq ağır hesab edir, həbs qətimkan tədbirinin dəyişdirilməsini tələb edir. Həm Əvəz Zeynallı, həm Elçin Sadıqov ölkədə kifayət qədər tanınmış ictimai-siyasi şəxsdir, bu fakt onların istintaqdan yayınma ehtimalını mümkünsüz edir. Bu baxımdan istintaq müddətində onların həbsdə saxlanmasına heç bir zərurət yoxdur.
İnanırıq ki, onlar istintaqın tam obyektiv və hərtərəfli aparılmasına həbsdə yox, azadlıqda daha çox töhfə verərlər. Çünki hər iki şəxs günahsız olduğunu şəffaf, ədalətli istintaq nəticəsində sübuta yetirə bilər.
Azərbaycanda ictimai rəydə məhkəmə-hüquq sisteminə inamın olmadığı hər kəsə məlumdur. Bunun səbəbi istər istintaq orqanlarının, istər məhkəmə instansiyalarının əksər hallarda qeyri-şəffaf fəaliyyəti, qəbul etdiyi sifarişli, qanunsuz, ədalətsiz qərarlardır.
Azərbaycan məhkəmələrinin qanuna söykənməyən, sifarişli qərarlar qəbul etdiyi Avropa İnsan Haqları Məhkəməsinin də çox sayda qərarı ilə dəfələrlə sübuta yetirilib.
AY Partiya hesab edir ki, Zeynallı və Sadıqovun barəsində cinayət təqibinin başlanması və həbs edilməsi olayında siyasi çalarlar var. Bu baxımdan hər iki şəxs barəsində həbs qərarı dəyişdirilməli, istintaqın qərəzsiz, ədalətli, şəffaf aparılması təmin olunmalıdır.
Son olaraq, əlavə edirik ki, indiyədək Vəkillər Kollegiyası və Mətbuat Şurasının susqunluq nümayiş etdirərək, olaya münasibət bildirməməsi böyük təəssüf hissi doğurur. Hər iki qurumun mövqesizliyini qınayır və bir an əvvəl adekvat reaksiya bildirməsini tələb edirik.