Azərbaycan Yüksəliş Partiyasının
26 fevral – Xocalı Soyqırımının 29-cu
ildönümü ilə əlaqədar anım mesajı
Tarix boyunca Azərbaycan xalqı yadelli işğalçılar ilə savaşdı, vətənini qorudu və dəfələrlə qalib oldu.
Yalnız çar Rusiyasının Qafqaza və Azərbaycana gəlişi ilə xalqımızın iki əsrlik əsarəti və milli faciəsi başladı. İstər 19-cu, istərsə də 20-ci əsrdə Azərbaycan xalqına qarşı dəfələrlə qırğınlar və kütləvi məhvetmələr sistematik hal aldı. Faciələr bitmir, xalqın ah-naləsi səngimirdi.
Belə bir vəziyyətdə xalqımızın mütərəqqi qüvvələri 1917-18-ci illərdə istiqlal üçün çalışır, yeni Azərbaycan dövlətinin qurulmasına çalışırdı. Bu fəalliyyətin qarşısını almaq üçün rus imperiyasının təmsilciləri ilə erməni quldurlarının silahlı dəstələri tarixdə 31 Mart – Azərbaycanlıların Soyqırımı kimi bilinən qırğınları törətdilər. On minlərlə azərbaycanlının öldürüldüyü həmin hadisələrə baxmayaraq, Qafqaz İslam Ordusu və Azərbaycan Xalq Cümhuriyyətinin silahlı qüvvələri vətənimizi rus-erməni hərbi birləşmələrindən qurtardı, bütün ərazilərimizi canilərdən azad etdi.
74 il sonra - 1992-ci ilin fevral ayının 25-dən 26-na keçən gecə bir daha rus (366-cı alay) və erməni silahlı birlikləri yenidən cinayət törətdi, yüzlərlə Azərbaycanlını bir gecədə öldürdü. Uşaq, qadın, qoca demədən həmin gecə öldürülən insanların hamısı mülki əhali, Xocalı şəhərinin sakinləri idilər. O gecə bir şəhər yer üzündən silindi, bir mədəniyyət ocağının odu söndürüldü. O hadisənin adı Xocalı Soyqırımıdır.
AY Partiya rəhbərliyi və üzvləri Xocalı Soyqırımında qətlə yetirilən bütün insanlarımız üçün dərin üzüntü və hüzün hissi keçirərək bəyan edirlər ki, xalqımıza qarşı törədilən heç bir cinayət cavabsız qalmadığı kimi, Xocalı Soyqırımını törədənlərinin də ədalət məhkəməsi qarşısında hökmü oxunacaq və cəzası veriləcək.
O məşum gecədə və Qarabağ savaşında həyatını itirmiş bütün mülki insanlarımıza Uca Yaradandan rəhmət diləyir, xalqımızın bir daha belə faciələri yaşamamsı üçün Azərbaycan Ordusuna güc və qüvvə arzulayırıq.
