Şərqdə ilk demokratik respublikanın - Azərbaycan Xalq Cümhuriyyətinin yaranmasından 103 il ötür.
Azərbaycan Xalq Cümhuriyyətinin qurulması Ulu öndər Məhəmməd Əmin Rəsulzadənin rəhbərliyi ilə Azərbaycan Milli Şurası tərəfindən 18 may 1918-ci ildə Tiflis şəhərində elan olunub.
Azərbaycan Milli Şurasının İstiqlal Bəyannaməsində deyilirdi ki, Azərbaycan xalqı hakimiyyətə malik olduğu kimi, Cənub-Şərqi Zaqafqaziyanı əhatə edən Azərbaycan da tam hüquqlu müstəqil bir dövlətdir;
Müstəqil Azərbaycan dövlətinin idarə forması Xalq Cümhuriyyətidir;
Azərbaycan Xalq Cümhuriyyəti bütün millətlərlə, xüsusilə qonşu olduğu millətlər və dövlətlərlə mehriban münasibətlər yaratmaq əzmindədir;
Azərbaycan Xalq Cümhuriyyəti milliyyətindən, məzhəbindən, sinfindən, silkindən və cinsindən asılı olmayaraq öz sərhədləri daxilində yaşayan bütün vətəndaşlarına siyasi hüquqlar və vətəndaşlıq hüququ təmin edir;
Azərbaycan Xalq Cümhuriyyəti öz ərazisi daxilində yaşayan bütün millətlərin sərbəst inkişafı üçün geniş imkanlar yaradır.
1918-ci il sentyabrın 15-də ağır döyüşlər nəticəsində AXC milli ordusunun və Nuru Paşanın başçılıq etdiyi Qafqaz İslam Ordusunun hissələri Bakını bolşevik-daşnak və ingilis hərbi dəstələrindən azad edəndən sonra Azərbaycan hökuməti Bakıya köçüb.
1918-ci il dekabrın 7-də saat 13:00-da Hacı Zeynalabdin Tağıyevin qızlar məktəbinin binasında Azərbaycan parlamentinin təntənəli açılışı olub. Parlamentin açılışında Azərbaycan Milli Şurasının sədri M.Ə.Rəsulzadə geniş təbrik nitqi söyləyib.
AXC qısa ömründə böyük nailiyyətlər əldə edib. İlk dəfə qadınlara seçim hüququ tanıyan və qadın-kişi bərabərliyini təmin edən cümhuriyyət, milli ordu quruculuğu, milli valyutanın buraxılması, milli bankın yaradılması, demokratikləşmə, azad seçkilər, beynəlxalq əlaqələr və beynəlxalq ictimaiyyət tərəfindən Azərbaycan istiqlalının rəsmən tanınması, Azərbaycanın bütövlüyünün təmin olunması, iqtisadi islahatların aparılması və digər sahələrdə böyük işlər görüb.
Cəmi 23 ay yaşayan AXC 1920-ci il aprelin 28-də rus bolşeviklərinin işğalı nəticəsində devrilib.
Azərbaycan Yüksəliş Partiyası xalqımızı bu böyük gün münasibətilə təbrik edir, başda Məhəmməd Əmin Rəsulzadə olmaqla, Xalq Cümhuriyyətinin yaranması üçün çətinliklərə sinə gərən, həyatını, sağlamlığını, ailəsini bu yolda fəda edən bütün böyüklərimizi, müstəqilliyimiz, torpaqlarımız uğrunda canlarından keçən şəhidlərimizi sayğı ilə anır, Cümhuriyyətimizin, müstəqilliyimizin sonsuzadək var olmasını arzulayır, bunun üçün bütün gücü ilə xidmət göstərəcəyini bəyan edir.
Yaşasın Cümhuriyyətimiz!
Bir kərə yüksələn bayraq, bir daha enməz!