Azərbaycan xalqı 30 il boyunca vətənə borclu gəzdi. Bu borc uşağından tutmuş yaşlısına qədər hər kəsin ən dərin yarası idi. Ümumiyyətlə, Qarabağ yeganə mövzu idi ki, cəmiyyətdə hər kəs bir nəfər kimi torpaqların geri qaytarılmalı olduğunu düşünürdü. Odur ki, 44 günlük müharibə xalqımızın vətənə mənəvi borcunun qaytarılması deməkdir həm də. Nə mutlu ki, şanlı ordumuz, canını məmnuniyyətlə vətən yolunda qoymağa hazır, torpağın codarlığından dodaqları çatlamış və qələbəyə susamış igidlərimiz bizi vətən borcundan xilas etdi. Bu dava Azərbaycan xalqının haqq işi və dövlətin tarix qarşısında borcu olan davadır. Bir Vətən müharibəsidir. Vətən müharibəsi təkcə işğal altında inləyən torpaqların azad olunması ilə yox, həm də milli qürurumuzun yüksəlişi ilə səciyyələnir.

Qarabağda qəhrəmanlıq dastanı yazan, əsl şücaətlər göstərən, ölməz Şəhidlərimizin ruhları qarşısında baş əyirik.

8 noyabr - Zəfər bayramı Azərbaycanın öz dövlət sərhədlərini bərpa etmək, regionda dominant ölkə statusuna nail olmaq və geostrateji dividentlər qazanmaq baxımından çox önəmlidir. Bölgədə kommunikasiya xətlərinin açılması, Turan qapısı adlandırılan Zəngəzur dəhlizinin bərpası da 8 noyabr - Zəfər bayramının əhəmiyyətinin göstəricilərindəndir.

44 günlük Vətən savaşı və qazanılmış zəfər bölgədə siyasi kartların yenidən paylanması üçün ciddi təkan oldu. Artıq tarixi torpaqlarımızın da adları siyasi meydanlarda çəkilməyə başlanıb. Biz, AY Partiya olaraq tarixi torpaqlarımızın da bərpası diləyi ilə Azərbaycan xalqının Zəfər bayramını qutlayırıq.