Bu gün “Azərbaycan Respublikası Hökuməti ilə Türkmənistan Hökuməti arasında Xəzər dənizində “Dostluq” yatağının karbohidrogen resurslarının birgə kəşfiyyatı, işlənməsi və mənimsənilməsi haqqında Anlaşma Memorandumu” imzalanıb.

AY Partiya hesab edir ki, bu addım Azərbaycan ilə Türkmənistan xalqları və ictimai-siyasi qurumları arasında yeni əməkdaşlıq dövrünün başlanğıcı ola bilər. Buna çox ehtiyac var. İki dövlətin fəaliyyəti nəticəsində Mərkəzi Asiya respublikalarının da əməkdaşlıq platformasına qoşulması və Türk-Oğuz-Qıpçaq birliyinin formalaşdırılması AY Partiya olaraq təmənnamızdır.

Azərbaycan Türkmənistan və Qazaxıstanla birlikdə əməkdaşlığını gücləndirdikcə Xəzər dənizinin Türk dünyasının iç dənizi olmasını təmin edəcək. Bu da digər Xəzəryanı ölkələrin siyasətinə və bizə qarşı olan mövqeyinə müsbət təsir edəcək. 

AY Partiya Azərbaycan ilə Türkmənistan arasında mədəni, humanitar, sosial, iqtisadi, elmi, təhlükəsizlik və digər sahələrdə inkişafını dəstəkləyir və alqışlayır, iki ölkə vətəndaşlarının vizasız və sərbəst səfərlərinin təmin olunmasını hər iki ölkə rəhbərliyindən arzulayır, Azərbaycan və Türkmənistan xalqlarını imzalanmış memorandum münasibəti ilə təbrik edir.

Yaşasın Azərbaycan-Türkmənistan qardaşlığı və dostluğu!