Azərbaycan Milli Azadlıq Hərəkatının simvollaşmış dəyərləri arasında ən öndə gələnlərindən biri, şübhəsiz, “Azadlıq” qəzetidir. 1989-cu ilin dekabrın 24-də “Azadlıq” qəzeti həftəlik olaraq Azərbaycan Xalq Cəbhəsinin orqanı kimi işıq üzü görüb. Qəzetin ərsəyə gəlməsində ən böyük əməyi olanlardan biri isə sözsüz ki, Milli Azadlıq Hərəkatının öncüllərindən olan Nəcəf Nəcəfovdur.
“Azadlıq” qəzeti o illərdə xalqın səsini mətbuatda əks etdirən nadir mətbuat orqanı idi. Məhəmməd Əmin Rəsulzadənin, Əbülfəz Elçibəyin, Türk Dünyasının tanınmış simalarının yazıları, çıxışları, müsahibələri oxuyucuların suallarına milli və siyasi məsələlərdə işıq tutur, yol göstərirdi. Unutmayaq ki, Sovet hakimiyyəti hələ ayaqda idi və erməni təcavüzü artıq başlamışdı. Belə bir vaxtda siyasi iqtidardan əlini üzmüş xalqımız nicat yolunu ancaq Milli Azadlıq Hərəkatında görürdü. Bu mənada, “Azadlıq” qəzeti adi bir mətbu orqandan daha çox məna kəsb edirdi. Onun səhifələri qurtuluşun düsturunu göstərən məkan idi. Ona görə də bir çox insan üçün AXC demək elə “Azadlıq” qəzeti demək idi.
Bu gün “Azadlıq” qəzetinin ilk nüsxəsinin çapından 31 il ötür. Tarixi missiyası azadlığa gedən yolda xalqımıza bələdçilik etmək olan “Azadlıq” qəzetinin yaranmasında əməyi keçən başda Nəcəf Nəcəfov və mübarizə yoldaşları olmaqla əbədiyyətə qovuşmuş hər bir insanımızın xatirəsini ehtiramla yad edirik, həyatda olanlarına can sağlığı diləyirik, “Azadlıq” qəzetinin redaksiya heyətini və oxuyucularını təbrik edirik.
