Əziz soydaşlarımız!
Təbiətin və cəmiyyətin oyanması mənasını daşıyan daha bir Novruz günlərini yaşamaqdayıq. Builki bayramı Qarabağda azad olunan torpaqlarımızla birlikdə qarşılayırıq. Bizə bu günləri yaşadanları unutmuruq, canından keçən şəhidlərimizə rəhmət, yaralılarımıza şəfa, qazilərimizə can sağlığı diləyirik. Onların şücaəti və qəhramanlığı bizim ürəyimizdə əbədiyyən yaşayacaq.
Qədim Türklərdə Yeni Gün, Yeni İl – Erqenekon qurtuluşundan bəri qeyd olunan Novruz Bayramının əsas dörd təbiət ünsürü olan hava, su, torpaq və od kimi müqəddəs saydığımız elemntlərin cəmidir Vətən. İndi vətənimizin Qarabağdakı səması, çayları, əraziləri azad olunub. Bizim xalq olaraq öhdəmizə düşən o əraziləri yenidən canlandırmaq, yeni ocaqlarımızı qalamaq, yurdumuzu şənləndirməkdir. Müzəffər ordumuzun başlatdığı işi müqəddəs xalqımızın müəllimləri, həkimləri, inşaatçıları, idarəçiləri, polisləri, hakimləri, sənayeçiləri, fermerləri – bir sözlə bütün zümrələrdən olan insanlarımız tamamlamalıdırlar. Siyasilərin üzərinə düşən vəzifə bu yenidənqurmaya, yenidəndoğuşa, yenidəndirçəlişə lazımi şəraiti yaratmaqdan ibarətdir.
Dəyərli vətəndaşlarımız!
Hər bir xalq tarix qarşısında çətin imtahanları keçərək böyüməkdədir. Biz xalq olaraq, Qarabağ imtahanını əcdadlarımızın ruhu, gələcək nəsillərimizin mühakiməsi qarşısında alnıaçıq, üzüağ şəkildə keçmişik. Ulu Tanrı xalqımıza bir daha belə imtahan yaşatmasın.
Yaşadığımız bu tarixi günlərdə Türk Dünyasının gözü Azərbaycandadır. Birlik, dirilik, bütünlük, həmrəylik yolunda bütün Turan elləri Azərbaycanı özlərinə nümunə kimi görürlər. İndi millət olaraq bizim qarşımızda daha bir imtahan durur. Bu, demokratiya, fərdi hürriyət, sosial ədalət, açıq cəmiyyət, qanunların aliliyi – bir sözlə, bizi yüksəlişə aparacaq olan zəruri ictimai-siyasi formasiyanın qurulması imtahanıdır.
Azərbaycan Yüksəliş Partiyasının rəhbərliyində və hər bir üzvündə əminlik var ki, xalq olaraq, millət olaraq biz bu imtahandan müvəffəqiyyətlə keçmək üçün ictimai və siyasi iradəmizi bir yumruq kimi birləşdirib, Qarabağdakı hərbi zəfərimizi mülki həyatımızdakı nailliyyətlərimizlə taclandıracağıq. Ona nail olduğumuz gün təqvim ilimizin deyil, milli tariximizin Yeni Gününü – Novruzunu qeyd edəcəyik.
Bütün çətinliklərə baxmayaraq, hər bir məsələdə zəfər qazanacağımıza əminlliyimizi dilə gətirir, belə ağır, bir o qədər də şərəfli yolda hər birinizə uğur diləyir, yurdumuza, elimizə, obamıza yüksək inkişaf arzulayıram.
Novruz Bayramınız qutlu olsun!