Azərbaycan Yüksəliş Partiyasının elektrik enerjisinin və təbii qazın qiymətinin artırılması ilə əlaqədar etiraz bəyanatı
Tarif Şurasının oktyabrın 16-da keçirilən növbəti iclasında elektrik enerjisi və təbii qazın ölkədaxili tariflərinin tənzimlənməsi adı altında elektrik enerjisi və təbii qazın pərakəndə satış tarifini artırması birmənalı qarşılana bilməz.
Ölkədə inflyasiya həddinin artıq ikirəqəmli olması, sürətlə artan bazar qiymətləri fonunda tariflərin qaldırılması ilə bağlı gətirilən səbəblər alıcılıq qabiliyyəti və gəlirləri onsuz da aşağı olan əhalinin ağır sosial durumu ilə heç bir halda uzlaşmır.
Azərbaycan Yüksəliş Partiyası hesab edir ki, indiki vaxtda qiymətlərin artırılması üçün ciddi bir səbəb yox idi və bu, bütün hallarda növbəti dəfə xalqın cibinə əl uzatmaq, zərərlə işləyən inhisarçı dövlət müəssisələrinin ziyanlarını, kəsirlərini xalqın hesabına kompensasiya etmək cəhdidir.
Məlumdur ki, tariflərin artırılması bütün sahələrdə, o cümlədən yeyinti və sənaye mallarının qiymətlərinin artmasına da təsir edəcək. Ölkə iqtisadiyyatında devalvasiyanın müşahidə edildiyi, əhalinin gəlirlərinin kəskin azaldığı, son altı ay ərzində ərzağın qiymətlərinin durmadan artdığı, əhalinin aylıq qazancının 55 faizini ərzağa, 25 faizini isə kommunal ödənişlərə xərclədiyi bir vaxtda bu tarif indeksinin artırılması onsuz da durumu ağır olan ölkə əhalisinin böyük bir hissəsinin, həmçinin aztəminatlı ailələrin güzəranının daha da ağırlaşmasına, müflisləşməsinə gətirib çıxaracaq. Bu səbəbdən Tarif Şurası son qərarına yenidən baxmalıdır.
Azərbaycanda əhaliyə satılan elektrik enerjisinin, təbii qazın vətəndaşların alıcılıq qabiliyyətini və gəlirlilik səviyyəsini, həmçinin işığın şişirdilmiş dəyərini də nəzərə alsaq, görürük ki, hətta bundan öncəki qiymətlər də baha olub.
Azərbaycan Yüksəliş Partiyası bəyan edir ki, hökumət ilboyu ziyanla işlədiklərini iddia edən iri inhisarçı dövlət müəssisələrinin yaranmış borclarını, habelə büdcə kəsirini əhalinin çox minimal olan gəlirləri hesabına kompensasiya etmək siyasətinə son qoymalıdır.
Dünya standartları ilə müqayisədə Azərbaycanda elektrik enerjisinin və təbii qazın istehsal edilməsinə çəkilən xərclər iki dəfə çoxdur. Bu xərclərin şişirdilməsi həm də korrupsiya ehtimalı yaradır. Nəzərə alanda ki, elektrik enerjisinin və təbii qazın istehlak həcminə limitlər qoyulub, insanların aşağı alıcılıq qabiliyyətinə görə yeni qiymətlər çox bahadır. Qış mövsümü ilə əlaqədar guya limit olaraq aşağı həddin müəyyənləşdirildiyi barədə deyilənlərin də heç bir əsası yoxdur. Elə ona görə də, indiki dövrdə qiymətlərin artırılmasına ehtiyac yox idi.
Partiya Tarif Şurasını əhalinin sosial vəziyyətini ağırlaşdıracaq, sosial gərginliyi artıracaq qiymət artımındansa, onun maya dəyərini yenidən hesablamağı, xərcləri aşağı salmağı, idarəetməni optimallaşdıraraq daha effektiv etməyə çağırır.