Bu gün Şimali Kipr Türk Respublikasının qurucusu və birinci prezidenti Rauf Raif Denktaşın əbədiyyətə yürüməsindən 9 il ötür. Bu zaman dilimində onun yoxluğu hiss olunduğu kimi, sağlığında yürütdüyü siyasətin də nə qədər doğru olduğunu bir daha anlayırıq.
Gənc yaşlarından Kipr Türklərinin milli hərəkatının üzvü olan Rauf Denktaş o dövrün məşhur liderləri Fazil Kiçik və Faiz Kaymak kimi siyasət adamları ilə bir yerdə addımlayırdı. Adadakı vəziyyətin Türklərin əleyhinə olduğu həmin illərdə Denktaş yeni təşkilatlanmanın yollarını axtarır, dostları ilə birlikdə müqavimət planlarını qururdu. Bunun nəticəsində 1958-ci ildə dostları ilə birlikdə Türk Müqavimət Hərəkatını qurdu və ona rəhbərlik etdi. Təsadüfi deyil ki, adanın yunanəsilli rəsmi orqanları onu adada istənilməyən insan olaraq elan etdilər. Gizli yollarla da olsa, Denktaş adaya gəldi və mübarizəsinə davam etdi.
Bu mübarizənin son mərhələsi isə yeni Türk dövlətinin, Kipr Federativ Türk Dövlətinin qurulması idi. 1975-ci ilin 13 fevral tarixində bu dövləti elan edən Denktaş həm də onun rəhbəri oldu. Eyni şəkildə 15 noyabr 1983-cü ildə Şimali Kipr Türk Respublikasının da elanına və quruculuğuna liderlik edən Rauf Denktaş 2005-ci ilə qədər bir neçə dəfə Prezident seçkilərinin qalibi oldu və dövlətə rəhbərlik etdi.
Kipr Türklərinin ən ağrılı-acılı günlərində mübarizə yoldaşları ilə birlikdə yeni respublikanın quruculuq işlərini öz üzərinə götürən Denktaş idarəçiliyi illərində əsla təvazökarlığından güzəşt vermədi və onu tanıyanların yaddaşında necə vardısa, elə də qaldı. Dünya bir Türk dövlət adamının əzəmətini də, zərif qəlbli olmasını da, həyatın acısına tab gətirməklə yanaşı, ən kiçik fürsətdə sevinməyi bacarmağı da Rauf Denktaşın timsalında gördü.
AY Partiya böyük Türk siyasət adamı, dövlət xadimi Rauf Raif Denktaşı ehtiramla yad edir, ŞKTR-nın müstəqilliyinin və istiqlalının əbədi qalacağına inanır.