Türk milləti haraları idarə edibsə, orada heç kimi milli, dini, irqi ayrı-seçkiliyə məruz qoymayıb. Ona görə də əsrlərlə idarə etdiyi torpaqlarda bu gün də eyni xalqlar yaşayır, eyni dinlərə ibadət edilir. Fəqət, Osmanlı, Qacar və bu kimi imperiyaların zəifləməsi, dağılması ilə birlikdə bir çox ərazilərdən Türklərin çıxarılmasının, qovulmasının, öldürülməsinin və soyqırımına məruz qalmasının şahidiyik. Belə qanlı hadisələrdən biri Kipr Türklərinə qarşı törədilmiş Qanlı Noel (Qanlı Milad) qətliamıdır.
Kipr adasında iki qonşu xalqın – Türklərin və Rumların (Kipr Yunanları) birlikdə yaşamaq arzusunun nəticəsi olaraq, ortaq müstəqil Kipr Respublikasının qurulmasına dair razılaşmalar bir çox faşist və şovinist yunan güclərini və Yunanıstandakı qüvvələri narahat etməyə başlamışdı. Yunanlar hər səfərində bu razılaşmaları pozmağa çalışır, Kipr adasında etnik təmizlik keçirərək Türkləri qırıb-qovub adanı özlərinə birləşdirməyə (enosis) fürsət axtarırdılar. Ona görə də adadakı ekstremist rumları silahlandırır, antitürk təbliğatını təşviq edirdilər. Nəticədə gözlərini qan bürümüş azğın rum terrorçular (EOKA təşkilatı mənsubları) 1963-cü ilin 21-25 dekabr tarixlərində onlarla Türk kəndinə, yüzlərlə türk ailəsinə qarşı hücuma keçdilər. Bu hücumların qanlı nəticələri haqqında oxuyanda bu gün də insanın qanı donur, göz yaşları sel kimi axır. Hamam otağında gizlənən ana və üç azyaşlı uşağının güllələnməsi, kəndlərdə qəfil yaxalanıb evini tərk edə bilməyən qoca ər və arvadın faciəsi, onlarla qadın, yeniyetmənin evinin önündə öldürülməsi – bütün bunlar rum canilərinin törətdikləri cinayətlərin ancaq az bir hissəsidir.
Öz tarixində qonşuları tərəfindən dəfələrlə xəyanətə uğrayan Türk milləti hər zaman olduğu kimi, bu səfər də bu cinayətləri və caniləri cəzasız qoymadı. Kipr Türklərinin milli dirənişi gücləndi, bərkidi və sonunda adadakı Türklərin təhlükəsizliyinin qarantiyası olan müstəqil Quzey Kipr Türk Respublikası quruldu. Millətimiz öz tarixi boyunca nə enosislər, nə miatsumlar görüb. Hamısını tarixin zibilliyinə atıb, bundan sonra da atacaq.
Kipr adasında 57 il öncə baş verən o qanlı hadisələr zamanı həyatını itirən hər bir soydaşımızın ruhu qarşısında baş əydiyimizi, əziz xatirəsinin daim ürəyimizdə yaşayacağını bildirməklə bərabər AY Partiya olaraq vurğulamaq istəyirik ki, biz hər zaman Kipr Türklərinin milli istiqlal mübarizəsini dəstəkləyəcəyik.
