Bu gün Qafqaz Türk-İslam Ordusunun əfsanəvi komandanı, Osmanlı ordusunun generalı Nuru Paşanın anım günüdür (Nuri Killigil; 1890, İstanbul - 02.03.1949, Sütlücə, İstanbul).

Gənc yaşlarından hərb sənətinin incəliklərini dərindən mənimsəyən Nuru Paşa Osmanlı dönəmində bir sıra döyüşlərə qatılaraq, mahir bir sərkərdə kimi böyük şöhrət qazanıb. Elə bu fitri qabiliyyətinə görə də qardaş ölkəyə - öz tarixinin ən kövrək və həyəcanlı anlarını yaşayan Azərbaycana göndərilib.

Azərbaycan İstiqlalının oturuşmasında, torpaqlarımızın erməni daşnaklarının işğalından qurtulmasında müstəsna xidmətləri olan tarixi şəxsiyyətdir. Onun komandanlığı altında Qafqaz Türk-İslam ordusu Şərqdə ilk demokratik dövlət olan Azərbaycan Xalq Cümhuriyyətinin ideallarının gerçəkləşməsi uğrunda şanlı döyüş yolu keçərək azadlıq mübarizəmizin tarixinə öz misilsiz töhfəsini verib.

Ruhu şad olsun.