Azərbaycan xalqı tarixinin ən çətin anlarında belə bir çox Türk xalqlarına köməklik göstərməyə davam edib, onların dərdinə şərik çıxıb. Belə xalqlardan biri bizə qardaş xalq olan Qaqauz Türkləridir. Keçən əsrin sonlarında Qaqauzlara qarşı bəzi qüvvələrin haqsız hucumlarının ağır vaxtlarında Türkiyə və Azərbaycan dövlətləri onları tək qoymamış, mümkün olan bütün yardımları etmişdir. Bu gün isə artıq Qaqauz Yeri özünün 26-cı quruluş ildönümünü qeyd edir.
Qaqauz Yeri bir çox azərbaycanlılar üçün də artıq Vətəndir. Onlar Qaqauz Yerinin inkişafında, güclənməsində fəal iştirak edir, Qaqauzlarla Azərbaycanlılar arasında əlaqələrin qurulmasına nail olurlar. Bu, bizi ikiqat sevindirir.

Qaqauzlar çox qonaqpərvər, xoşniyyətli xalqdır. Onların hər biri Qaqauz Yerinin Türk Dünyası ailəsi içində layiqlli yerini almaq üçün ciddi şəkildə çalışır. Təsadüfi deyil ki, məhz Qaqauz Yerində dəfələrlə Türk Dünyası qurultayları, festivalları, görüşləri keçirilib.
Moldova Respublikasının inkişafında da Qaqauzların özlərinə məxsus yeri var. Moldova da Azərbaycan kimi separatizmlə qarşılaşan keçmiş SSRİ ölkələrindən biridir. Bu məsələ bizləri - Azərbaycanlıları, Moldovalıları, Qaqauzları bir-birimizə daha da yaxın edir. Biz əl-ələ verərək, ölkələrimizin torpaq bütünlüyü, müasir inkişaf xəttinə inteqrasiyası üçün çalışmalıyıq. Qaqauz Türkləri bu mənada Azərbaycan ilə Moldova arasındakı münasibətlərdə xüsusi rol sahibi ola bilərlər.
AY Partiyası bütün Qaqauzları bu əlamətdar gün münasibəti ilə təbrik edir, vətənlərinin inkişafına dair çalışmalarında uğur diləyir.
Quruluş günün qutlu olsun, Qaqauz Yeri!

Bu gün sənin bayrağının, məclisinin, egemenliyinin günüdür!
Qoy, özün kimi soydaşlarının – Türk Xalqları ailəsinin içində yerin daim uca və şərəfli olsun!