Türk tarixinin ən hüznlü hadisələrindən biri – Sarıqamış Hərəkatından 106 il ötür. Bu hərəkatın ən ağrılı-acılı tərəfi odur ki, minlərlə Türk əsgəri rus-erməni silahlı güclərinin gülləsindən deyil, qışın soyuq, şaxtalı havasında donaraq şəhid olmuşdu. Adətən, Sarıqamış şəhidləri üçün axan göz yaşlarının səbəbi də bu göstərilir.
Biz istəyirik ki, bu gün şəhidlərimizin necə öldüklərini deyil, necə yaşadıqlarını və müharibə meydanında necə qəhrəmanlıqlar göstərdiklərini yad edək. Osmanlı Türkiyəsi üçün o ağır dövrdə Çar İmperiyasının əlavə cəbhə açması hərb meydanında olan vəziyyəti bir az da çətinləşdirmişdi. Üstəlik, rus qoşunlarına yardım edən xain erməni birlikləri də dinc əhaliyə divan tutaraq vəziyyəti daha da ağırlaşdırmış, yerli əhalinin qaçqın kimi İç Anadoluya tərəf üz tutmasına səbəb olmuşdular. Buna baxmayaraq, Türk ordusunun rəhbərliyi qısa zaman ərzində ordu birliklərini işğal ordularına qarşı göndərmiş və onların irəliləməsinin qarşısını almışdı.
Əməliyyatın ilk dövründə, yəni Sarıqamış Hərəkatı zamanı nisbi uğursuzluq olsa da, sonrakı aylarda Türk ordusu bir çox məntəqə və şəhərdən rus-erməni ordularını çıxarıb və sonrakı illərdə Bakıya qədər qovub. Sarıqamış döyüşləri haqqında danışanda bu məsələni unutmamaq lazımdır. Çünki həmin döyüşlərdə bir qəhrəmanlıq yaşanıb. Ölümlə bitəcəyini bilə-bilə Türk əsgəri aldığı əmrə tabe olub, mövqeyindən geri çəkilməyib. Həmin əsgərin sonrakı irəliləyişinin səbəbi o zamankı qorxmazlığı və dönməzliyi olub.
Müasir nəsillərin ürəyində Sarıqamış şəhidlərinin ayrıca bir yeri var. Bu da təbiidir. Biz onların hər birinin üşüsə də, donsa da, həyatından keçsə də, necə əzm və qətiyyətlə savaşdığını unutmuruq. Onların qəhrəmanlıq dastanı ilə yetişən bu günün əsgərləri yeni zəfərlərə doğru irəliləyir, düşmənlərimizi gəldikləri yerə qədər qovurlar. Bu da deməkdir ki, Sarıqamış şəhidlərinin mübarizəsi bitməyib, davam edir.
AY Partiyasının hər bir üzvü Sarıqamış şəhidlərini dərin ehtiramla yad edir, onların ruhu qarşısında baş əyir.
Ölməz qəhrəmanlarımızın əziz xatirəsi daim ürəklərimizdə yaşayacaq!