“Xəbər verildiyi kimi, işğaldan azad edilmiş Suqovuşan yüksəkliklərində ərazini minalardan təmizləyən hərbçilər Ermənistan silahlılarının saxlanc yerini aşkarlayıblar. Kamuflyaj toru ilə örtülmüş anbardakı çəlləklərdə ASALA terror təşkilatının bayrağı və müəyyən miqdarda psixotrop həb tapılıb”. 

Bu sözləri editor.az– açıqlamasında Azərbaycan Yüksəliş Partiyası Başqanın I müavini, İcra Aparatının rəhbəri Bəhrəm İsmayılov deyib.

O bildirib ki, bu fakt əslində ermənilərin mahiyyətcə terrorçu xislətində olmalarının göstəricisidir: “Normal ölkələrinin ordularında hərbçilərə Vətən, Bayraq, Torpaq sevgisi aşılanır. Ümumiyyətlə, sivil cəmiyyətlərdə uşaq bağçalarından tutmuş, ali məktəblərə qədər uşaqlar, gənclər Vətənə, Bayrağa və ən önəmlisi İnsana sevgi ruhunda tərbiyə olunur. Erməni hərbçiləri isə terrorçuları nümunə götürürlər. Onların qəhrəmanları terrorçulardır – Andranik, Njde, ASALA”.

B. İsmayılovun fikrincə, burada əsas narahatedici məsələ terrorçuların, terrora sitayiş edənlərin Qarabağa məqsədyönlü şəkildə yerləşdirilməsidir: “Ermənilər hər zaman böyük dövlətlərin aləti olub. Şimal qonşumuz Rusiya da Azərbaycanla bağlı işğal planlarını həyata keçirmək üçün onlardan istifadə edib. Bunu tarixdən yaxşı bilirik. Qarabağa erməni terrorçuların yerləşdirilməsi, orada hər cür şəraitlə təmin olunması da bu qəbildəndir. Rusiya və Azərbaycanı müstəmləkəyə çevirmək istəyən ölkələrin terrorçuları orada saxlamasının məqsədi lazım olan anda ölkəmizə qarşı onlardan istifadə edə bilməkdir. Hesab edirəm ki, Azərbaycan bu sahədə böyük təcrübəsi olan qardaş Türkiyənin dəstəyi ilə terrorçulara qarşı mübarizə aparmalı, onların kökünü torpaqlarımızdan kəsməlidir”.