Bakı metrosunun "20 Yanvar" stansiyasında törədilən terror aktından 27 il ötür. 

1994-cü il mart ayının 19-da həmin stansiyada partlayış törədilib. Qatarın ilk vaqonuna qoyulmuş saat mexanizmli partlayıcı qatar stansiyada dayananda işə düşüb. Terror aktı nəticəsində 14 nəfər ölüb, 49 nəfər yaralanıb. Partlayışdan metrostansiyasının tavanı bəzi hissələrdə çöküb.

İstintaq və məhkəmə yolu ilə sübut edilib ki, terror aksiyasını Ermənistan xüsusi xidmət orqanları hazırlayıb, separatçı "Sadval" təşkilatının üzvləri həyata keçirib. 

"20 Yanvar" metro stansiyasında partlayışın törədilməsində ittiham olunan və Ermənistanda xüsusi terror-təxribat hazırlığı keçmiş 30 sadvalçı cinayət məsuliyyətinə cəlb edilib. Rusiya xüsusi xidmət orqanlarının bu işdə əlinin olub-olmadığına dair məlumat əldə olunmayıb.

AY Partiya rəhbərliyi və üzvləri bu terror aktı zamanı həyatını itirən həmvətənlərimizin əziz xatirəsini ehtiramla yad edir, yaraları qalıcı olan soydaşlarımıza şəfa diləyir, xalqımızla hər bir çətin günümüzdə həmrəy olacağımızı bəyan edir.