9 iyun - Azərbaycan mədəniyyətinin ən parlaq nümayəndələrindən biri, sovet epoxasının dünyaca tanınmış xadimi, saysız-hesabsız mükafatların sahibi, unudulmaz Rəşid Behbudovun anm günüdür. 

Rəşid Behbudov 1915-ci il dekabrın 14-də Tiflisdə əslən Şuşalı xanəndə Məcid Behbudov Behbudalı oğlunun ailəsində dünyaya gəlib. 

Uşaq yaşlarından məktəb xorunda oxuyan Rəşid 1933-cü ildə Dəmiryolu Texnikumuna daxil olub.

Hərbi xidmətdən sonra Tiflis estrada qruplarından birində çıxış etməyə başlayıb.

İkinci Cahan savaşında Krım cəbhəsində müğənni kimi çıxışlar edib.

1945-ci ildə Rəşid Behbudovun baş rolda çəkildiyi Bakı kinostudiyasında Üzeyir Hacıbəyovun eyniadlı operettasının motivləri əsasında çəkilən "Arşın mal alan " filmi tez bir zamanda nəinki Azərbaycanda, bütün Sovet İttifaqında böyük populyarlıq qazanıb.

Böyük sənətkar R. Behbudov 1946–1956-cı illərdə Azərbaycan Dövlət Filarmoniyasının, 1953–1960-cı illərdə fasilələrlə M.F.Axundov adına Azərbaycan Dövlət Opera və Balet Teatrının solisti, 1957–1959-cu illərdə Azərbaycan Dövlət Konsert Ansamblının təşkilatçısı və rəhbəri olaraq çalışıb. 1966-cı ildən musiqi və estrada sənətinin caz, balet, pantomim kimi müxtəlif janrlarını üzvi surətdə birləşdirən Azərbaycan Dövlət Mahnı Teatrını təşkil edib, ömrünün sonunadək onun solisti və bədii rəhbəri olub.

Bütün Sovet respublikaları ilə yanaşı, Argentina, Bolqarıstan, Belçika, Çili, Çin, Efiopiya, Finlandiya, Hindistan, İran, İraq, İtaliya, Misir, Türkiyə və s. ölkələrdə geniş repertuarla çıxış edən Rәşid Behbudov, Azərbaycan xalq mahnılarının və Azərbaycan bəstəkarlarının vokal əsərlərinin xarici ölkələrdə populyarlaşmasında çox böyük rol oynayıb. 

Rəşid Behbudov 1989-cu il iyunun 9-da Moskva şəhərində vəfat edib. Fəxri Xiyabanda dəfn olunub. 

Azərbaycan Yüksəliş Partiyası ölməz Rəşid Behbudovun adını böyük sevgiylə anır, xatirəsini daim əziz tutur.