Azərbaycan poeziyasının görkəmli nümayəndələrindən biri olan Xalq şairi Bəxtiyar Vahabzadənin doğum günüdür.

Bəxtiyar Vahabzadə məmləkətin ağrı-acılarını, Vətənin dərdlərini öz şeirlərində yorulmadan və yüksək poetik vüsətlə dilə gətirən milli şair kimi şöhrət qazanıb. Qələmə aldığı məşhur "Gülüstan" poemasına görə böyük təzyiqlərlə üzləşən B. Vahabzadə sonralar da tutduğu yoldan çəkinməyərək, öz poetik amalına sadiq qalıb, bir-birindən gözəl, həm də milli düşüncəni özündə əks etdirən unudulmaz şeirlər yazıb.

Bəxtiyar Vahabzadə deyəndə ilk olaraq, onun milli düşüncənin oyanmasında gördüyü danılmaz işlər yada düşür. Keçən əsrin sonunda Azərbaycanda geniş vüsət tapan Milli Azadlıq Hərəkatı dönəmində B. Vahabzadə şəxsiyyətinin və yaradıcılığının da əhəmiyyətli təsiri danılmazdır.

Azərbaycan Yüksəliş Partiyası ölməz şair Bəxtiyar Vahabzadənin xatirəsini əziz tutur, böyük sayğı ilə yad edir.

Azərbaycan-Türkiyə

Bir millətik, iki dövlət

Eyni arzu, eyni niyyət

Hər ikisi Cümhuriyyət

Azərbaycan-Türkiyə.

Bir ananın iki oğlu

Bir ağacın iki qolu

O da ulu, bu da ulu

Azərbaycan-Türkiyə.

Ana yurdda yuva qurdum

Ata yurda könül verdim

Ana yurdum, ata yurdum

Azərbaycan-Türkiyə.

Birdir, bizim hər halımız

Diləyimiz, amalımız

Bayraqlarda hilalımız

Azərbaycan-Türkiyə.

Dinimiz bir, dilimiz bir

Ayımız bir, ilimiz bir

Eşqimiz bir, yolumuz bir

Azərbaycan-Türkiyə.