"Tanınmış və təcrübəli jurnalist Aytən Məmmədovaya qarşı dünən baş verən soyuq silahlı hücum,özünə və ailəsinə təhdid və zorakılıq aktını qətiyyətlə pisləyir və düşünürəm ki, bu bir media nümayəndəsinə qarşı deyil, bütövlükdə cəmiyyətdə azad sözə qarşı mafiya qanunlarına söykənən bir aksiyadır". 

Xeber365.com məlumat verir ki, bu sözləri Azərbaycan Yüksəliş Partiyasının Başqanı Anar Əsədli jurnalist Aytən Məmmədovaya qarşı baş verən bıçaqlı hücuma münasibət bildirərkən deyib. 

Partiya başqanı hüquq-mühafizə orqanlarının üzərinə düşən işin öhdəsindən gələrək, bu cinayəti törədənlərin və onun sifarişçilərinin ən yaxın zamanda tapılıb, cəzalandırılması üçün lazım olan addımları atacağına ümid etdiyini bildirib: 

"Cinayətkarın hüquqi cəzasını alması mətbuat nümayəndələrinin müstəqil və obyektiv şəkildə vəzifələrini icra etməsinə şərait yaradacaq. Əks halda, bu ölkəmizin adına bir ləkə olaraq yazılacaq, növbəti dəfə beynəlxalq təşkilatların insan hüquq və azadlığı ilə bağlı hesabatlarında əksini tapacaq".