18 iyun Azərbaycan Respublikasında İnsan hüquqları günüdür.
Vətəndaş cəmiyyətinin sağlam təməli insan hüquqlarının qorunması müstəvisində bərabərlik, özgürlük, ləyaqət, ədalət və bir çox bəşəri dəyərin qovşağında təzahür edir. Dövlətlərin və mövcud cəmiyyətlərin demokratik inkişafı insan kapitalının dəyər meyarının yüksək olduğu zaman reallaşmasının mümkünlüyü bir həqiqətdir.
Azərbaycan cəmiyyətində saysız-hesabsız sosial, iqtisadi, siyasi, mədəni qüsur və çatışmazlıqların olduğunu nəzərə alsaq, bu kimi səbəblərin insan hüquqlarının qorunmasının yetərli olmadığından xəbər verir, hətta bir çox hallarda kobud şəkildə tapdandığının dəfələrlə şahidi oluruq. Sıravi insanlarla yanaşı, cəmiyyətin həssas təbəqələrinə qarşı olan etinasız münasibət təəssüf və məyusluq yaradır. Son illərin ən acı olayları sırasında qazi və Vətən müharibəsi iştirakçılarımızın ayrı-ayrı dövlət qurumları tərəfindən incidilməsi, haqlarının tapdanması, sosial-psixoloji durumlarına yetərli diqqətin olmaması, bir sözlə laqeydlikdən doğan intihar hallarının adiləşdiyinin şahidiyik. Bu kimi durumların qarşısının alınması üçün görülən işləri cəmiyyətin önündə məsuliyyət daşıyan dövlət idarəçiləri sistemli şəkildə həyata keçirməli, insanları məlumatlandırmalıdır. Ən azından cəhdlərin olduğunu görmək müəyyən mənada dövlət qanunlarının aliliyinə olan inamı artırar, insanlarda ümid, güvən yaradar.
Təbii ki, sadalanacaq çox məqam, bu yolda görüləcək çox iş var.
Hüquqi və dünyəvi dövlət quruculuğunun sütunu olan meyarlar insana, ümumiləşdirəriksə, xalqa xitab və xidmət etməlidir. İnsan hüquqlarının qorunması azad cəmiyyət, müstəqil dövlət, inkişaf etmiş ölkə deməkdir.
Dünya və ölkəmiz yeni boyutun, yeni düzənin astanasındadır. Hətta artıq müəyyən kəsərli addımlar belə atılıb. Dünya dəyişir, biz də dəyişirik. Geriyə yol yoxdur. Keçdiyimiz yol bizim nəticə çıxaracağımız təcrübəmiz, bu gün isə sabaha qoyduğumuz təməldir. Hüquqlarımızın qorunması, rifahımızın yüksəlməsi, özgürlüyümüzün var və daimi olmasının qurucusu biz, təminatçısı isə dövlətdir. Hər bir vətəndaş bu məsuliyyəti dərk etməli, çətin də olsa, ağır daşları yerinə qoymaq üçün fədakarlıq göstərməlidir. Bu yol uzundur. Bezmədən, usanmadan yola davam.
Diləyimiz isə Azərbaycanın insan hüquqlarının qorunduğu ən qüdrətli dövlətlər sırasının önündə görməkdir. İşimiz çox, ümidimiz sonsuzdur...
Nigar Sultanlı
Azərbaycan Yüksəliş Partiyası Başqanının müavini