İstiqlalçı deputat Şahmərdan Cəfərovun vəfatının 26-cı ildönümü ilə əlaqədar AY Partiyanın anım mesajı
Bu gün istiqlalçı deputat, torpaqlarımızın azadlığı uğrunda iştirak etmiş mübariz döyüşçü Şahmərdan Məhəmməd oğlu Cəfərovun anım günüdür.
1958-ci il avqustun 12-də Naxçıvanda anadan olan Şahmərdan Cəfərov 1975-1977-ci illərdə Rusiyanın Kaluqa şəhərində hərbi xidmətdə olub. Hərbi xidməti bitirəndən sonra Kaluqada hüquq təhsili alıb.
Bir müddət orada işləyib və 1988-ci ildə Azərbaycana qayıdıb.
Azərbaycan Xalq Cəbhəsinin öndə olan liderlərindən olub. Torpaqlarımızın müdafiəsi uğrunda böyük fəaliyyət göstərib.
1988-ci ildə Şərur özünümüdafiə batalyonunun komandiri, 1992-ci ildən 1994-cü ilə qədər Azərbaycan Respublikası Sərhəd Qoşunları İdarəsi 1 saylı Naxçıvan Sərhəd Dəstəsinin komandanı olub.
O, 1990-cı ildə Şərur rayonundan parlamentə üzv seçilib.
17 oktyabr 1991-ci ildə Azərbaycanın müstəqillik aktına səs verən 43 deputatdan biridir.
1995-ci il iyunun 17-də Kələkidə mərhum prezident Əbülfəz Elçibəyin yanından qayıdarkən yolda güllələnib,
iyunun 29-da isə vəfat edib. Azərbaycanın istiqlaliyyəti və torpaqlarımızın müdafiəsi uğrunda böyük xidmətlər göstərmiş Şahmərdan bəyin əziz xatirəsini AzərbaycanYüksəliş Partiyası dərin ehtiramla yad edir.