Azərbaycan Yüksəliş Partiyası
Başqanı Anar Əsədli:

Keçmiş vergilər naziri Fazil Məmmədov dünyasını dəyişib. Mərhumu xüsusi mühafizə olunmuş məzarlıqda dəfn ediblər. Belə bir məşhur ifadə var: “Can güvənliyi, mal güvənliyi”.

Bu xüsusi mühafizə olunmuş məzarlıq söhbətini eşidəndə düşündüm ki, bizdə cəsəd güvənliyi də lazım imiş.

Ömürlərini korrupsiyaya, rüşvətə, yaltaqlığa həsr etmiş, simalarını itirmiş şəxslərin nə sağlıqlarında can və mal güvənıikləri oldu, nə də ölümlərindən sonra meyit güvənliyi. Bu nə həyatdır, bu nə ömürdür?..

Necə yaşamaq? Həyatın bizim qarşımıza qoyduğu böyük problemdir. Rüşvət, korrupsiya, əclaflıq, vicdansızlıq, bu kimi insanlığa yaraşmayan sifətlər vəzifə və pula satılmışları nəinki yaşadıqları müddətdə qorxudur, onları ölümlərindən sonra da xalqdan ürküdür.

Öz gərəksiz məzarlarını qoruma altına almaq istəyirlər. Dəyərmi dəyərsiz bir həyat sürüb xalqdan bu qədər qorxmağa?

Vicdan və ləyaqət öndə gəlir. Vəzifə adımızı yüksəltmək üçündür, rəzil olmaq üçün, şərəfsiz ömür yaşamaq üçün deyil. Amma həyatını ləyaqətlə yaşamış, əyilmədən, satmadan, satılmadan, yaltaq olmadan - bir sözlə, İNSAN kimi yaşamış şəxsiyyətlərimiz də oldu.

Bu statusu gənclik üçün yazdım. Necə yaşamaq və necə xatırlanmaq sizdən asılıdır. Önünüzdə örnək olacaq ömür yolu var. Seçim sizin. Elə edin ki, öləndə də qorxa-qorxa ölməyəsiniz...