Azərbaycan Yüksəliş Partiyasının Milli İstiqlal məfkurəmizin banisi, Azərbaycan Xalq Cümhuriyyətinin qurucusu Məhəmməd Əmin Rəsulzadənin anadan olmasının 137-ci ildönümü münasibəti ilə anım mesajı
Bu gün Azərbaycanda XX əsrin ən böyük ideoloqu, Azərbaycan Xalq Cümhuriyyətinin qurucu atalarından biri, Milli İstiqlal məfkurəmizin banisi Məhəmməd Əmin Rəsulzadənin doğum günüdür.
O, bir fədaidir, çünki Azərbaycanın istiqlal qazanması, Cümhuriyyətimizin qurulması üçün bir çox sahədə çabalar göstərib, həyatını, ailəsini, doğmalarını bu yolda fəda verib. O həm də qalibdir, çünki özü görməsə belə, başladığı yol və apardığı mübarizənin sonu uğurla nəticələndi və Azərbaycan XX əsrin sonunda yenə müstəqil dövlət oldu. Eyni zamanda o dövlətçiliyimizin yaradıcısıdır, çünki bu gün məhz onun heçdən yaratdığı üçrəngli bayrağımız dövlət rəmzi kimi qürurla dalğalanır. O, ən böyük demokratdır, çünki Cümhuriyyəti quranda sadəcə millətin istiqlalını deyil, həm də hər bir vətəndaşın hürriyyətinin müdafiə edirdi.
Çağdaş Azərbaycanın formalaşmasında Rəsulzadə irsinin əhəmiyyəti və yeri heç bir başqa ideologiya ilə müqayisə edilə bilməz. Rəsulzadə irsi deyəndə Azərbaycan milli azadlıq hərəkatının adətən həm keçmişi, həm də bu günü nəzərdə tutulur. Ancaq Qarabağ savaşında əldə olunan zəfər və bu zəfərin Türkiyə ilə birlikdə əldə olunması gerçəyi, hərbi sahədə olan uğurumuzun sinrejisinin azad cəmiyyət quruculuğuna transferi, ölkədə demokratik islahatların aparılmasının vacibliyi, ən əsası da bu islahatların mahiyyəti - bütün bunların hamısı yüz il əvvəl Rəsulzadənin arzuları ilə eynidir.
Rəsulzadə bizim ancaq və hətta daha çox keçmişimiz və bu günümüz deyil, o, indi artıq bizim gələcəyimizdir. Azərbaycanda istənilən siyasi qüvvə bu gerçəyi nə qədər tez qəbul eləsə, dövlətçiliyimizin güclənməsi üçün bir o qədər faydalı olacaq. Azərbaycanın yaxın yüz il üçün Rəsulzadə yoluna sıx bağlanması hər bir vətəndaşımızın hürriyyətinin təmin olunması yolundan keçir. Müstəqil Azərbaycanın azad vətəndaşı olmaq ən böyük şərəfdir. Belə bir cəmiyyəti tam olaraq qurduğumuz gün Rəsulzadənin vəsiyyətini tamamlamış olacağıq.
Bizə istiqlalı və hürriyyəti daddıran adam, böyük azərbaycanlı, dünyaya gəlişin mübarək! Adını və sanını daim yüksək tutacağımızdan əmin ola bilərsən!
