"İranın 90-cı illərdən - müstəqilliyimizi bərpa etdiyimiz ilk vaxtlardan, ondan sonrakı dövrlərdə - Ermənistanın ərazilərimizi işğal prosesi boyunca və xüsusilə 44 günlük savaş dönəmində sərgilədiyi mövqe hər zaman Ermənistanın mənafeyinə xidmət edib. Lakin Azərbaycan ordusunun 44 günlük savaşdakı zəfərindən sonra İranın əsəbləri tab gətirmədi və Azərbaycana qarşı olan niyyətini çox açıq şəkildə biruzə verdi".

Bu sözləri Sitat.info-ya açıqlamasında AY Partiya başqanı Anar Əsədli bugünkü Paşinyan-Rəisi görüşünü dəyərləndirərkən deyib.

Onun sözlərinə görə, müddət öncə İranın ali dini lideri Ayətullah Əli Xameneinin Türkiyə prezidenti Rəcəb Tayyib Ərdoğanla görüşdən sonra Qarabağla bağlı paylaşdığı tvit isə əslində rəsmi Tehranın Ermənistanın tərəfində olduğunun açıq şəkildə elanı idi: "Məlumdur ki, Qarabağın ətrafı, Zəngəzur dəhlizi ilə bağlı Azərbaycan və Ermənistan, Azərbaycan və İran, eləcə də ABŞ və Rusiya arasında müəyyən fikir ayrılıqları var. Bu və Azərbaycanın verilən təminatların yerinə yetirilməsini tələb etməsi mövcud vəziyyəti xeyli gərginləşdirib, hətta müharibə ritorikası həddinə çatdırıb.

Yaranan mənzərə onu göstərir ki, İran indiyə qədər passiv, seyrçi qaldığı məsələlərdə aktiv yer almaq istəyir. Bu hal özlüyündə bir o qədər təhlükəli deyil, lakin prosesin Rusiya-Ukrayna savaşı fonunda baş verməsi nəticəni dəyişə bilər. Belə ki, Ukrayna cəbhəsində zəifləyən Rusiyanın çəkildiyi nöqtələrin İran tərəfindən doldurulması cəhdləri və bununla bağlı Moskva-Tehran razılaşmasının olması mümkündür".