Dünən Aİ-nin təşkilatçılığı ilə Brüsseldə, yaxın günlərdə isə ABŞ Dövlət katibi Blinkenin vasitəçiliyi ilə Vaşinqtonda Azərbaycan və Ermənistan nümayəndə heyyəti sülh müqaviləsi və sərhəd problemini həll etmək üçün görüş keçirəcək. Sizcə Putinin təşkil etdiyi Soçi görüşündən sonra Aİ-nin və Vaşintonun aktivləşməsi Azərbaycan və Ermənistan danışıqlarını intensivləşdirmək və ilin sonuna kimi sülh müqaviləsinin bağlanmasına xidmət edirmi? Və ilin sonuna kimi sülh müqaviləsi bağlana bilərmi? Avropa və ABŞ-ın bu aktivliyi Moskvanı qısqanclıq sindromuna salmaqla Azərbaycan və Ermənistan sərhəddində növbəti təxribatlar törətməyə vadar edə bilərmi? Və yaxud artıq edirmi? Çünki, Vaşinqton görüşü elan olunan günü yəni, dünəndən Kəlbəcər istiqamətində təxribatlar başlayıb. Bu və ya digər suallar ətrafında Azərbaycan Yüksəliş Partiyasının sədri Anar Əsədli Visiontv.az saytına açıqlama verib. Həmin açıqlamanı diqqətinizə çatdırırıq:

“Dəfələrlə vurğulamışıq ki, Rusiyanın regiondan getməsinə təkan verəcək səbəb Qafqazda sülhün bağlanması ola bilər. Bu isə o deməkdir ki, sülhün olmasından narahat olan tərəf Rusiyadır. Lakin bir yandan da Qərb ölkələrinin sülh prosesinə çox yaxından müdaxilə etmək istəkləri Rusiyanı qıcıq etməyə bilməz. Əlbəttə, qərbin sülhə yönəlik istəkləri ilə bəzən nümayiş etdirdikləri mövqe üst üstə düşmür. Və bir də ən əsas cəhət odur ki, regiona Qərb bir başa müdaxilə edə bilmir. Bu səbəbdən də sülh prosesini Qərbin sürətləndirəndirdiyini düşünmək yanlışdır. Avropa İttifaqı Ermənistanla Azərbaycanın sülh müqaviləsi imzalamasını istəyir. Çünki Azərbaycan Avropanın etibarlı enerji təchizatçısıdır. Ümumiyyətlə isə sülh prosesi qarşısı alınmaz bir prosesdir və dünyada cərəyan edən bütün hadisələr sülhü labüd edir. Zəngəzur koridorunun açılması bu düyünün açılmasında açar rolu oynayır. O ki, qaldı bu ilin sonuna qədər sülh müqaviləsi imzalana bilərmi sualınıza, biz hər halda çalışmalıyıq ki, bütün gücümüzlə buna nail olaq. Millət və dövlət olaraq sülhlə bağlı iradəmizi ortaya qoymalıyıq. Bizim xalq olaraq iradəmiz bu münaqişəni birdəfəlik həll etməlidir.
Münaqişənin sonlanmasına isə tək maneə Rusiyadır. Azərbaycan məsələnin həllini Rusiyanın inhisarından çıxarmaq üçün bundan sonra da Qərb müstəvisində görüşləri, danışıqları davam etdirməlidir.
Cənubi Qafqazda qonşuluq münasibətlərinin normallaşmasının və münaqişələrin bitməsinin tək yolu Rusiyanı neytrallaşdıra biləcək Qərblə münasibətləri daha da genişləndirməkdən ibarətdir.
Lakin unutmayaq ki, Qərb üçün sülh də elə Qərb üçündür. 30 ildə Qərb də bir işə yaramadı. Biz bunu gördük. Fransa daim Ermənistanın yanında oldu, Amerikada erməni lobbisi at oynatdı. Ancaq vurğuladığımız kimi, yeni siyasi situasiya yaranıb. Belə olduğu halda Cənubi Qafqazın gələcək inkişafı, əminamanlığı Azərbaycanla Ermənistanın böyük sülh müqaviləsindən keçir. Heç bir təxribata uymadan bunu bacarmalıyıq.”