Müasir Azərbaycanın müstəqillik tarixində əvəzsiz xidmətləri olmuş tədqiqatçı alim, professor Ədalət Tahirzadənin 70 yaşı tamam olur.
İctimai-siyasi, elmi fəaliyyətində dövlətçiliyi və türkçülük ideyasını daim əsas xətt seçən alimin bu istiqamətdə böyük xidmətləri olub.
Dilçi, filoloq-mətnşünas, tarixçi, publisist kimi fəaliyyət göstərən Ədalət Tahirzadə İsmayıl bəy Qutqaşınlı, Haşım bəy Vəzirov, Salman Mümtaz, Məşədi Azər Buzovnalı, Rəşid bəy Əfəndiyev, Mirabbas Mirbağırzadə, Məhəmmədəmin Darğazadə və başqaları kimi Azərbaycan klassiklərinin bəlli olmayan bir çox əsərini üzə çıxarıb, onları ərəb qrafikasından latın qrafikasına çevirib, ilk dəfə nəşr etdirib.
Bunlarla yanaşı, 1930-cu illərdə repressiyaya məruz qalmış, adları unudulmuş çox sayda Azərbaycan ziyalısını, Azərbaycan Cümhuriyyəti Parlamentinin üzvlərini, Cümhuriyyətin xaricə oxumağa göndərdiyi tələbələri müəyyənləşdirərək “Azərbaycan Cümhuriyyəti tələbələri”, “1920-ci ilədək ali məktəblərdə oxumuş azərbaycanlılar" adlı kitablar da hazırlayıb.
Mərhum Prezident Əbülfəz Elçibəyin mətbuat katibi olmuş Ədalət Tahirzadə Elçibəylə bağlı iki kitabın müəllifidir.
Ədalət Tahirzadə hazırda ali təhsil müəssisəsində fəaliyyətini davam etdirir.
Azərbaycan Yüksəliş Partiyası dəyərli alimi doğum günü münasibətilə təbrik edir, sağlam və uzun ömür arzulayır, yaradıcılığında uğurlar diləyir.