Təhsil naziri Emin Əmrullayevin bugünkü açıqlamaları geniş müzkirələrə və təbii ki, narazılığa səbəb olub.
Cənab naziri dinlədikdən sonra onun Azərbaycana adaptasiyada problem yaşadığını düşündüm. Nazirimiz deyir ki, məktəblərdə valideynlərdən pul yığılması məsələsi o hələ şagird olan zamanlarda da varmış. Sonra da əlavə edir ki, rüşvətxorluğun əleyhinədir, amma valideynin bütün vergilərini ödəyəndən sonra artıq qalan bir manatını özünün və digərlərinin daha yaxşı təhsili üçün xərcləmək hüququ təmin edilməlidir.
Bilirik ki, inkişaf etmiş ölkələrdə belə təcrübə var: hansısa zəngin iş adamı, sənətçi, digər peşə sahibləri məktəblərə yardım edir. imkansız uşaqların təhsil almasına dəstək verir. Amma həmin ölkələrdə bu, sırf könüllülük prinsipi əsasında zəngin insanlar tərəfindən həyata keçirilir.
Bizim nazir isə maddi durumu yaxşı olmadığı üçün övladını dövlət məktəblərində oxutdurmağa məcbur qalan valideynlərdən bunu gözləyir. O valideynin imkanı olsa, uşağını heç bir standarta cavab verməyən dövlət məktəblərində niyə oxutdurur ki?!
Bundan başqa, neft-qaz ölkəsi olan Azərbaycanda dövlətin məktəblərində normal təhsilin təmin olunması üçün niyə şərait yaradılmır ki, valideynlərdən mədət umulur? Bəlkə məktəblərin qarşısına "nəzir qutusu" qoyulsun"
Nazir deyir ki, daha çox uşağın bağçalara getməsini istəyir.
İstəmək yaxşıdı, amma nazirimiz bilmir ki, ölkədə, xüsusilə paytaxt Bakıda ciddi şəkildə uşaq bağçası problem var. Övladlarını dövlət bağçalarına uşaq göndərmək istəyən valideynlər az qala, bir il əvvəldən müraciət edirlər, yer axtarırlar. Çünki hansı bağçaya gedirsən, hamısı doludur, baxmayaraq ki, dövlət bağçalarında uşaqlara xidmət və diqqət çox aşağıdır. Özəl bağçaların isə qiymətləri hamıya məlumdur. Orta aylıq maaşla işləyən valideynin 1 illik əməkhaqqı uşağını özəl bağçaya göndərməyə kifayət deyil.
Nazir məktəblərdə xoşagəlməz hallardan da danışıb, 150 min nəfər müəllimin 1,5 milyon şagirdlə bağlı hansısa səhvə yol verməsini mümkün sayıb. Tamam, başa düşürük, insan səhvə yol verə bilər. Amma bu xoşagəlməz hallar davamlı olursa - müəllim saçı uzun oğlana qız deyir, hansısa nadinc uşağı döyməsi ilə fəxr eləyir, 13 yaşlı Elina intihara sövq edilir, məktəbdə dini klip çəkilir, 9-cu sinif şagirdi müəllimindən hamilə qalır, ən nəhayət, seçki saxtakarlıqlarının baş rolunu müəllimlər oynayırsa, deməli, olanlara “bəsit səhv” deyib, keçmək olmaz.
Sonda onu qeyd edim ki, bu hakimiyyətin yüksək vəzifələrini tutan məmurların əksəriyyətinin açıqlamaları adətən narazılıq yaradır, reallıqdan uzaq olur. Bəzən düşünürsən ki, bu adamlar elə danışmasa, yaxşıdır.
Deməli, sistem problemi var. İnsanların haqq etdiyi yerlərdə olmadığı ölkələrdə qanunların icrası mümkün olmadığından bundan artıq heç nə gözləmək də doğru deyil.
