Dəyərli dostlar!

 

Bildiyiniz kimi, bir neçə gün öncə uzun müzakirələrdən sonra uyğun zamanı seçərək, yeni təşkilatımızın - AZƏRBAYCAN YÜKSƏLİŞ PARTİYASInın yaranmasına qərar verdik. Məramımız, daşıdığımız ideoloji yük, göstərəcəyimiz fəaliyyət forması və söykəndiyimiz prinsiplər ilk bəyanatımızda qısaca göstərilsə də, sual doğura biləcək bir neçə məsələyə aydınlıq gətirmək istəyirəm.

Azərbaycanda müxalifət və iqtidar yönümlü kifayət qədər partiya mövcud olduğu halda niyə yeni təşkilatın yaranmasına qərar verdik?

Ölkədə istər iqtidar, istər müxalifət partiyalarında mövcud durumun onların demokratik prinsiplərə söykənməsi ilə bağlı söylədiklərinə vətəndaşların etinasız yanaşması düşündürücüdür.

 

Fikrimizcə, partiyalardakı situasiyanı tam təsbit etmək üçün bu qurumlardakı iyerarxiyanın formalaşmasına xüsusi diqqət yetirmək lazımdır. İllərdir, dəyişməyən siyasi partiya liderləri özlərindən sonra gələcək xələflərə yol açmadılar. Hər hansı bir müxalifət partiyasında partiya liderini əvəzləyəcək yetişmiş yeni siyasi sima görmürük. Baş verən bəzi əvəzləmələr zamanı siyasi dözümsüzlük və vahid gücün parçalanmasına xidmət edən əməllər isə təəssüf doğurdu. Müxalifət düşərgəsində baş verən bu kimi neqativ halların fonunda isə iqtidar partiyası sadəcə bir idarədir, heç bir normal daxili, alternativli seçkiyə belə ehtiyac duyulmur, hər şey təyinatladır və bu barədə heç danışmağa dəyməz.

 

Nəticə olaraq, təəssüf ki biz hər iki düşərgədə heç bir demokratik mühitin, azad rəqabətin olmadığının çox açıq şəkildə şahidi oluruq. Təbii ki, belə bir mühitdə yeni siyasi şəxslərin yetişməsi, parlaması və önə çıxması mümkünsüzdür. Əslində normal partiyada davamlılıq mütləq təmin olunmalı, yeni şəxslərin partiyalara cəlb olunması, onların fəaliyyətinə imkan yaradılması və sair şeylər mütləq və mütləq şəkildə təmin edilməlidir. Bunlar olmayacaqsa, o partiyanın irəli getməsi də mümkün deyil.

Bu gün Azərbaycanda yarım-repressiv idarəçilik, iqtisadi-sosial vəziyyətin ağırlaşması, işsizlik səbəbindən ölkəni on minlərlə insan tərk edib. Bu, doğrudur, amma, dürüstlük naminə qeyd etməliyik ki, özlərini demokrat adlandıran, yalnız bəyanat verməklə kifayətlənən, normal rəqabət mühiti olmayan partiyaları da yuxarıda qeyd etdiyimiz səbəblərdən kifayət qədər aktiv insan tərk edib. Gördüyünüz kimi, ortada çox da ciddi bir fərq yoxdur. Digər bir məsələ, çox təəssüf ki, Azərbaycandakı siyasi qüvvələr bu günlərinin və sabahlarının, YÜKSƏLİŞini xalqda deyil, sərhədlərdən kənarda axtarır. Nəticə aydındır - nəticəsizlik! Halbuki, bir neçə dairənin timsalında istər son parlament seçkiləri, istərsə də Vətəni, milləti, torpağı uğrunda canını verən şəhidlərimizə ümumxalq münasibəti bu tandemin kökündən yanlış, hətta kifayət qədər zərərli olduğunu bariz şəkildə ortaya qoyur.

Məsələnin mahiyyəti eynidir - XALQın içinə getmək, XALQla iç-içə olmaq! XALQla iç-içə olmağı, xalqdan güc almağı illərin siyasi təşkilatları bəlkə də yorğunluqdan edə bilməsə də, iqtidara yaxın partiyalar maraqlarına cavab vermədikləri üçün etmədi. Çox vaxt Azərbaycandakı siyasi qüvvələrin bir-birinə olan kinindən, küdurətindən, bəzən hakimiyyət hərisliyindən dolayı, millətin maraqları arxa plana keçirilir.

 

Mövcud siyasi qüvvələrdən fərqli olaraq, düşünürük ki, millətin və dövlətin YÜKSƏLİŞi XALQdan və XALQla bir arada olmaqdan keçir. Dövlət kifayət qədər zəkası, potensialı olan, müxtəlif ölkələrə səpələnmiş Azərbaycan vətəndaşlarını dünyanın hər yerindən buraya toplamalı və onların gücü ilə ölkəni YÜKSƏLİŞə aparmalıdır. Cəmiyyətdə siyasi-ideoloji mübarizə azad rəqabət şəraitində olmalı, siyasi qüvvələrin bir-birinə kini, küdurəti aradan qaldırılmalıdır.

Bütün bunlar Azərbaycan cəmiyyətində düşüncə yanlışlığının kifayət qədər özünə yer etdiyini göstərir. Bu problem mütləq və mütləq şəkildə həllini tapmalıdır.

 

Biz bunu etmək iddiasındayıq və edəcəyik.

 

Bizi məyus edən digər bir məqam isə illər öncə bu millətə, dövlətə Azərbaycanın müstəqilliyinin bərpasında xidməti olan dəyərli şəxslərin yalnız keçmişlə kifayətlənməsidir.

Biz dövlətimizin, millətimizin YÜKSƏLİŞi, XALQın rifahı, Azərbaycanın güclü bir dövlət olmasını istəyi ilə məsələlərə bu prizmadan yanaşaraq, iddiamızı ortaya qoyduq və YÜKSƏLİŞ PARTİYASInı yaratmağa qərar verdik.

Düşünürük ki, Azərbaycan dövlətinin YÜKSƏLİŞi, demokratik prinsiplərin tam bərqərar olması, Azərbaycanın intellektual potensialının dövlət idarəçiliyində yer alması üçün yeni nəfəsə, yeni simalara və yeni quruma ehtiyacı var.

Əziz həmvətənlər, biz bu missiyanı həyata keçirmək üçün qollarımızı çırmaladıq və sadaladıqlarımızı sizinlə birlikdə reallaşdıracağıq! Hər birinizə, hər birimizə uğurlar!