2 yanvar 1945-ci ildə anadan olan Səməndər Rzayev 1964-cü ildə indiki Azərbaycan Dövlət Mədəniyyət və İncəsənət Universitetinin "Dram teatrı və kino aktyoru" fakültəsinə daxil olub, dövrün böyük ustad sənətkarları Pza Təhmasib, Mehdi Məmmədov, Adil İsgəndərovdan sənətin sirlərini öyrənib. 1968-ci ildən rejissor Tofiq Kazımovun dəvəti ilə Akademik Milli Dram Teatrında çalışmağa başlayıb. Əsrarəngiz səsi, incə yumoru, həssas qəlbi ilə bir-birindən fərqli rollar yaradan usta sənətkar həm teatr səhnəsində, televiziya tamaşalarında, filmlərdə tamaşaçı rəğbəti qazanıb, yaddaşlara həkk olunub.

 

Azərbaycan filmi üçün ən məhsuldar sənətkarlardan hesab edilən S.Rzayev əllidən artıq filmdə istər aktyor, istərsə də dublyaj səsləndirmələrində yüksək peşəkarlıqla sənətkarlıq nümayiş etdirib.

 

S.Rzayevin aparıcısı olduğu "Bulaq" radio verilişi həmin dövr nəslinin mənəvi zənginliyinə xidmət edən ən dəyərli işlərindəndir. Usta aktyorun səs tempri ilə onun səsləndirdiyi xalq yaradıcılığı vəhdətinin möhtəşəm təsiri uzun illər dinləyici yaddaşının əvəzolunmaz mənəvi qidası idi.

 

Sevilən aktyor Səməndər Rzayev 27 mart 1986-ci il tarixində dünyasını dəyişib.

 

Azərbaycan Yüksəliş Partiyası sevilən və istedadlı sənətkar Səməndər Rzayevin xatirəsini dərin sayğı ilə yad edir.