Valideynlərindən birini itirmiş uşaqlar dövlət himayəsinə götürülməlidir

11 yaşlı qızın zorakılığa məruz qalması, dünyaya övlad gətirməsi dəhşətli olay olması ilə yanaşı, cəmiyyətimiz üçün ciddi narahatlıq doğurur. 

Hər kəs kimi, bu olay bizi də üzdü.

AY Partiya bu olaydan yola çıxaraq, valideynlərindən birini itirmiş azyaşlı və yeniyetmələrlə bağlı təkliflər paketi hazırlayıb, ictimaiyyətə təqdim edərək geniş müzakirə aparacaq və yekun sənədi müvafiq dövlət qurumlarına təqdim edəcək. 

Partiyanın Başqanlıq heyətində bu məsələni xüsusi müzakirə etdik. Paketin ana xətti valideynlərindən birini itirmiş azyaşlı və yeniyetmələrin 18 yaşına qədər dövlət tərəfindən himayə altına alınması, hüquqlarının qorunması olacaq. 

Burada məsələ maddi deyil, daha çox hüquqi, mənəvi himayədən söhbət gedir. Hər bir insan ikinci dəfə ailə qura bilər, bu, onun müstəsna hüququdur. 

Amma dövlət öz gələcəyinə, yəni yeni yetişən vətəndaşının taleyinə biganə yanaşmamalıdır.  

Dövlət hesab edirsə ki, 18 yaşına çatmamış şəxslərin evlənmək, səs vermək və s. hüquqları yoxdur, eyni məntiqlə bir valideyni olan uşaqlara da sahib çıxmalı, uşaq 18 yaşa çatana qədər tək valideyinin hüququnu bəzi məsələlərdə məhdudlaşdırmalıdır. 

Məsələn, uşağın kiminlə qalması ilə bağlı fikrinin soruşulması və ya məhdud şəkildə valideynin yeni ailəsinin yanında vaxt keçirilməsi və s. hüquqi məsələr təkliflər paketində yer alacaq.

"Uşaq hüquqları haqqında" Azərbaycan Respublikasının qanunu var, diqqətlə incələdim, bu qanunun yenidən və daha ciddi şəkildə işlənməsinə ehtiyac var. İcra hakimiyyətlərindəki qəyyumluq şöbələrinin fəaliyyətindən isə danışmağa dəyməz.

Anar Əsədli 

Azərbaycan Yüksəliş Partiyasının Başqanı