Vurğun Əyyubun doğum günüdür
Bu gün görkəmli şəxsiyyət, Azərbaycan Milli Azadlıq hərəkatının əfsanə isimlərindən biri olan Vurğun Əyyubun doğum günüdür.
Vurğun Əyyub 20-ci əsrin əvvəllərində böyük öndər Məhəmməd Əmin Rəsulzadə başqa olmaqla, Qurucu babalarımızın başlatdığı böyük mübarizə yolunun ən sadiq və dönməz yolçularından biri olub. Onun bütün həyatı və fəaliyyəti milli düşüncənin formalaşmasına, Azərbaycanda dövlətçiliyinin bərqərar olmasına və maarifçilik ideyalarının geniş yayılmasına həsr olunub.
1957-ci ildə dünyaya göz açan Vurğun Əliş oğlu Əyyub Azərbaycan Dövlət Pedaqoji Universitetində ali təhsil alıb. Bir neçə kənd məktəbində müəllim kimi çalışdıqdan sonra Bakıya dönərək yüksək qiymətlərlə bitirdiyi ali məktəbin filologiya fakültəsində elmi və pedaqoji fəaliyyətlə məşğul olub. 20-ci əsr Azərbaycan romantiklərinin yaradıcılığı barədə elmi işini müdafiə edərək filologiya elmləri namizədi alimlik dərəcəsi alıb. Ötən əsrin 70-80-ci illərindən başlayaq milli düşüncənin bərqərar olmasına xidmət edən gizli təşkilatlarda, o cümlədən, məşhur dissident filosof Asif Atanın "Ocaq" dərnəyində və milli ruhlu ziyalıların yaratdığı "Çənlubel" təşkilatında fəaliyyət göstərib. 1980-ci illərin sonunda alovlanan Milli Azadlıq hərəkatının önəmli simalarından biri olub. Hərəkatın avanqardı olan Azərbaycan Xalq Cəbhəsinin İdarə heyətinə üzv seçilib.1992-93 illərdə ölkəmizdə ilk dəfə yaranan Tələbə Qəbulu üzrə Dövlət Komissiyasına rəhbərlik edərək, Azərbaycanda ali məktəblərə rüşvətsiz qəbulu həyata keçirib. Bundan sonra yenidən pedaqoji fəaliyyətlə məşğul olan V. Əyyub, ölkəmizdə bir neçə aparıcı siyasi təşkilatın - Müsavat Partiyasının və Azərbaycan Demokratiya və Rifah Hərəkatının yaranıb formalaşmasında yaxından iştirak edib və onların rəhbərliyində təmsil olunub. Xəzər Universitetində ədəbiyyat kafedrasının müdiri işləyən Vurğun Əyyub 2019-cu ildə uzun sürən ağır xəstəlikdən sonra dünyasını dəyişib.
Azərbaycan Yüksəliş Partiyası Azərbaycanın böyük aydınlarından və qənimət şəxsiyyətlərindən biri olan Vurğun Əyyubu ehtiramla yad edir, parlaq xatirəsini daim əziz tutacağını bildirir.
