1937-ci ildə anadan olan Ramiz Abutalıbov Azərbaycan Dövlət Universitetini, Moskvada Ümumittifaq xarici ticarət və İctimai Elmlər Akademiyalarında təhsil alıb, Parisdə Birləşmiş Millətlər Təşkilatının təhsil, elm və mədəniyyət üzrə katibliyinin - UNESCO-nun əməkdaşı olub.

 

Azərbaycan Respublikası Xarici İşlər Nazirliyinin xüsusi tapşırıqlar üzrə səfiri, UNESCO üzrə Azərbaycan milli komissiyasının baş katibi vəzifələrində işləyib.

 

Ramiz Abutalıbov Azərbaycan Cümhuriyyətinin 1920-ci ildə süqutundan sonra mühacirətdə yaşamış Azərbaycan ictimai-siyasi xadimlərinin həyat və fəaliyyətlərinin araşdırılmasında, xaricdə arxiv sənədlərinin tapılmasında xüsusi rol oynayıb. Bu əvəzsiz tarixi sənədlərin toplanmasında və Azərbaycana gətirilməsində R.Abutalıbovun böyük zəhməti olub. Bu sənədlərlə bağlı on iki kitabın müəllifidir.

 

Dağlıq Qarabağ münaqişəsinə dair 1989-1992-ci illərdə Fransada çap olunmuş dörd kitabın tərtibçisi və naşiridir.

Parisdə 1989-cu ildə "Azərbaycan evi" assosiasiyasının yaradıcılarından biridir. O, Əlimərdan bəy Topçubaşova xatirə lövhəsinin, Fransanın azadlığı uğrunda həlak olmuş azərbaycanlılara Rodez şəhərində abidənin qoyulması, Fransada bir neçə mühacir həmvətənimizin qəbrinin bərpa edilməsində, "İçərişəhər" və "Muğam" sənətinin Ümumdünya irsi siyahısına daxil edilməsinin əsas təşkilatçılarından biri olub.

 

Azərbaycan Yüksəliş Partiyası Ramiz Abutalıbova Allahdan rəhmət diləyir, ailə üzvlərinə, yaxınlarına, Azərbaycan xalqına başsağlığı verir.