Dövlət büdcəsindən maliyyələşən və dövlətçilik perspektivləri baxımından kritik əhəmiyyət kəsb edən, eləcə də son illər diqqətlərin kəsildiyi, ümidlə yanaşılan "Yüksəliş" müsabiqəsinin sertifikatlarında böyük hərflərlə "РОССИЯ СТРАНА ВОЗМОЖНОСТЕЙ" yazılıb.
Bu, bir təxribatdır, yoxsa gerçək?
Gerçəkdirsə, nədir məqsəd?
Bu imzanın o sertifikatlarda olmasını belə dövlətçilik və milliləşmə baxımından böyük təxribat hesab edirəm.
Yaxın gələcəkdə ölkədə kritik postlara gətiriləcək həmin "yüksələn" kadrlarda bəri başdan Kremlə minnət hissi yaradılır?
Yoxsa, kadr seçimi prosesi Rusiyanın və ya bu ölkənin təşkilatlarının iştirakı ilə həyata keçirilir?
Bu və bu kimi suallarımıza cavab tələb edirik.
Elə bu sualların bizi apardığı kiçik araşdırmadan sonra o da məlum oldu ki, "Yüksəliş" müsabiqəsi Rusiyanın "Rusiya fürsətlər ölkəsidir" müsabiqəsi əsasında formalaşdırılıb. Bir başqa ölkədə keçirilən hər hansı müsabiqədən örnək almaq olar, amma bu, o demək deyil ki, seçim meyarları da rəsmi Moskvanın strateji maraqlarına və Kremlin meyarlarına uyğun olan kadrlar seçilsin.
Ən azından ortada olan görüntü bunu deyir. Yox, əgər belə deyilsə, o zaman bu müsabiqənin rəhbərliyi media nümayəndələrini, QHT təmsişçilərini dəvət edib, ictimaiyyətə geniş açıqlama versin.
Azərbaycan xalqı, xüsusilə ziyalılarımız bu məsələyə öz etirazlarını bildirməlidir.
Bu xalq son 200 ildir ki, Rusiya tərəfindən ən ağır şəkildə təqiblərə məruz qalmırmı, müxtəlif avantüralarla öldürülürb torpaqları, evləri işğal olunub, yağmalanmırmı?
Uzaq keçmişə müraciət etməyək. 2 il öncə baş verən 44 günlük Vətən müharibəsini yada salaq. Məgər Ermənistanı durmadan silahlandıran Rusiya deyildimi?
Qarabağ münaqişəsini yaradan Rusiya deyilmi?
20 Yanvar qırğını, Xocalı soyqırımı, torpaqlarımızı başqa xalqlara peşkeş çəkən, 1937-də ziyalımızın başını kəsən - bütün bunların müəllifi Rusiya deyilmi?
1920-ci ildə Cümhuriyyətimizi başımıza yıxan Rusiya deyilmi?
Bu boyda müsibətlərdən sonra bu müsabiqənin sertifikatını görəndə ağlımıza hansı versiya gəlməlidir?
Əzizlərim, AY Partiya olaraq, uzun zamandır, dövlət idarəçiliyində kadrların milliləşdirilməsi və bu yolla suverenliyimizin gücləndirilməsi məsələsini hər fürsətdə dilə gətiririk. Bu məsələnin üstünə getməyimizin səbəbi son 30 ildə başqa dövlətlərin, xüsusilə Rusiyanın uzantıları vasitəsilə Azərbaycanda həyata keçirilən təxribatlar, milli təhlükəsizlik konsepsiyamıza qarşı atılan addımlar, siyasi-iqtisadi, eləcə də təhsil layihələrinin idarəetmədə və ya önəmli postlarda yerləşdirilən kadrlar vasitəsilə fiaskoya uğradılmasıdır.
Buna görə də partiya olaraq, əsas hədəflərimizdən biri milli kadrların idarəetməyə cəlb olunması və bu yolla dövlətimizin inkişafına, millətimizin rifahının yüksəldilməsinə nail olmaqdır.
Bu baxımdan hesab edirəm ki, bəmüsabiqənin geniş ictimaiyyət tərəfindən sorğulanması vacibdir və dövlət üçün həyati əhəmiyyət daşıyır.
Anar Əsədli
Azərbaycan Yüksəliş Partiyası Başqanı
