AZƏRBAYCAN YÜKSƏLİŞ PARTİYASI
QADINLAR TƏŞKİLATININ ƏSASNAMƏSİ
1. ÜMUMİ MÜDDƏALAR
1.1. Azərbaycan Yüksəliş Partiyası (AY Partiya) Qadınlar Təşkilatı (bundan sonra mətndə QT) AYP-nin struktur vahidi olaraq partiyanın Baş Məclisində təsdiq olunan özünün Əsasnaməsi, partiyanın Məramnaməsi və Nizamnaməsi əsasında yaradılır və fəaliyyət göstərir.
1.2. QT-in tərkibi AY Partiyanın xanım üzvlərindən təşkil olunur.
1.3. QT-nin fəaliyyətində AY Partiyanın hər bir xanım üzvü könüllülük əsasında iştirak edə bilər.
2. FƏALİYYƏT PRİNSİPLƏRİ, HÜQUQ, MƏQSƏD VƏ VƏZİFƏLƏRİ
Qadınlar Təşkilatı:
2.1. QT kollegiallıq və çoxluğun demokratik hüququ prinsipləri əsasında fəaliyyət göstərir;
2.2. AY Partiyanın ailə, qadın və uşaqlar siyasətinin formalaşmasına kömək edir, Qadın Haqları Konsepsiyasının maddələrinin müəyyənləşdirilməsi üçün təkliflər irəli sürür;
2.3. Qadın problemləri ilə əlaqədar layihələr hazırlayır və həyata keçirir;
2.4. Müxtəlif qadın QHT-ləri, birlikləri və siyasi partiyaların qadınlar qolları ilə əlaqələr qurur, əməkdaşlıq edir;
2.5. AY Partiya rəhbərliyinin nəzarətində və razılığı ilə konfranslar, diskussiyalar, debatlar, mühazirələr, görüşlər, kütləvi tədbirlər həyata keçirir və iştirak edir;
2.6. AY Partiyanın Beynəlxalq əlaqələr şöbəsi ilə koordinasiyalı şəkildə xarici ölkələrin qadın təşkilatları və birlikləri ilə əməkdaşlıq edir, beynəlxalq qadın hərəkatlarına və platformalarına qoşulur;
2.7. AY Partiyanın kursu və AY Partiya üzvü qadınların fəaliyyəti ilə əlaqədar video-çarxlar hazırlayır, bülletenlər və flayerlər buraxır, fleşmoblar keçirir.
2.8. Öz nəzdində qadınlar üçün Məşğulluq Mərkəzi, Peşə və Əl sənətləri Kursları, Sosial Fəaiyyətlər Klubu və bu kimi qurumlar açır və idarə edir;
2.9. Partiyanın ali orqanları tərəfindən dövlət qurumlarına və ölkənin mərkəzi və yerli idarəetmə orqanlarına təklif olunan siyahılara, habelə AY Partiyanın struktur vəzifələrinə AY Partiya üzvü olan xanımların namizədliklərini irəli sürür.
3. TƏŞKILATIN STRUKTURU VƏ İDARƏETMƏ ORQANLARI
3.1. Təşkilatın ali orqanı ildə bir dəfədən az olmayaraq çağırılan Ümumi Yığıncaqdır.
3.2. Növbəti və növbədənkənar Ümumi Yığıncaq Təşkilatın icra orqanı tərəfindən, bu olmadıqda üzvlərinin və ya AY Partiya bölgə Qadınlar şöbələrinin 3/1-nin təşəbbüsü və tələbi ilə çağrılır;
3.3. Təşkilatın üzvlərinə Yığıncağın yeri və vaxtı haqqında iki həftə əvvəl məlumat verilməlidir.
3.4. Ümumi Yığıncağın səlahiyyətinə aşağıdakılar aiddir:
Təşkilatın Əsasnaməsinin qəbul və ona dəyişikliklər etmək;
Təşkilatın icra orqanlarını yaratmaq və onların səlahiyyətlərinin vaxtından əvvəl dayandırmaq;
Təşkilatın İdarə Heyətinin sədrini və üzvlərini seçmək;
illik iş planını və hesabatı qəbul və təsdiq etmək;
3.5. Ümumi Yığıncaq yalnız Təşkilat üzvlərinin yarısından çoxu iştirak etdikdə səlahiyyətli hesab olunur.
3.6. Ümumi Yığıncaqda müzakirə olunan məsələlər haqqında qərarlar sadə səs çoxluğu ilə qəbul edilir. Hər bir üzv bir səsə malikdir.
3.7. Təşkilatın fəaliyyətinə cari rəhbərliyi İdarə Heyəti həyata keçirir.
3.8. İdarə Heyəti Təşkilatın Sədrindən, onun müavinlərindən və digər şəxslərdən ibarət olan icra orqanıdır.
3.9. İdarə Heyəti kollegial icra orqanı olub aşağıdakı səlahiyyətlərə malikdir:
Təşkilatın üzvlüyünə qəbul edir və üzvlükdən azad edir;
təkliflər və layihələr irəli sürür;
Təşkilatın yerli şəbələrini və nümayəndəliklərini açır;
Təşkilatın başqa idarəetmə orqanlarının müstəsna səlahiyyətlərinə aid edilməyən bütün məsələləri həll edir.
3.10. İdarə Heyəti iclası üzvlərinin yarısından çoxu iştirak etdikdə səlahiyyətli sayılır və qərarları sadə səs çoxluğu ilə qəbul edilir.
3.11. İdarə Heyətinin sədri, sədrin müavinləri və digər üzvləri Təşkilatın Ümumi Yığıncağı tərəfindən 4 (dörd) il müddətinə seçilir.
3.12. Sədr:
Təşkilatı təmsil edir, onun adından müqavilələr bağlayır, etibarnamələr verir, Ümumi Yığıncağın və İdarə Heyətinin qərarlarının icrasını təşkil edir;
Ümumi Yığıncaq tərəfindən və bu Əsasnamə ilə onun üzərinə qoyulan digər funksiyaları həyata keçirir.
4. AY Partiya QADINLAR TƏŞKİLATININ YERLİ ŞÖBƏLƏRİ
4.1. Qadınlar Təşilatının fəaliyyətini əlaqələndirmək üçün AYP-nin rayon təşkilatları tərkibində QT-nin yerli şöbələri yaradılır;
4.2. Yerli şöbələrin fəaliyyəti, strukturu və idarəolunması bu Əsasnaməyə uyğun aparılır.