Azərbaycan Yüksəliş (AY) Partiyasının Güney Azərbaycandakı soydaşımız, siyasi fəal
Abbas Lisaninin qanunsuz həbsi ilə bağlı
BƏYANATI

Uzun illərdir İran İslam Respublikasının siyasi hakimiyyəti Güney Azərbaycandan olan milli fəalları sıxışdırmaqda, onları qanunsuz həbslərlə cəzalandırmaqda, ailə üzvlərini təqib etməkdədir. Bu şəxslərdən biri də Güney Azərbaycan milli hərəkatının öndərlərindən, dəyərli aydın Abbas Lisanidir ki, yaxın günlərdə onun saxlandığı həbsxanada dövrümüzün bəlası COVİD-19-a yoluxması, səhhətinin ağırlaşması xəbərləri gəlməkdədir.
Aldığımız bilgiyə görə, ailə üzvlərinin, vəkillərinin onun xəstəxanaya yerləşdirilməsi ilə bağlı heç bir tələbi hakimiyyət tərəfindən qəbul edilmir və Abbas Lisani bu gün faktiki olaraq ölüm ayağındadır.
Azərbaycan Yüksəliş Partiyası olaraq İran İslam Respublikası rəhbərliyinin bu addımını anti-humanist qərar, eyni zamanda öz milli haqların uğrunda mübarizə aparan Güney Azərbaycan fəallarına, konkret hörmətli Abbas Lisaniyə qarşı repressiv addım kimi qiymətləndiririk. Hesab edirik ki, bu, milli haqları uğrunda mücadilə aparan milyonlarla soydaşımızın mübarizədən çəkindirmək, onlarda qorxu, xof yaratmaq məqsədi daşıyır.
Dünyanın bir çox ölkələri COVİD 19 səbəbilə az ağır cinayət törədən şəxslərə qarşı amnistiya tətbiq edir, onları sağlamlıqlarını qorumaq məqsədilə ev dustaqlığına buraxır. Belə bir durumda rəsmi Tehranın pandemiyadan öz siyasi rəqiblərinə qarşı istifadə etməsi, nəinki BMT-nin İnsan Haqları Konvensiyasının, hətta bağlı olduğunu iddai etdiyi İslam fəlsəfəsinin əsasında dayanan mərhəmət prinsipinə əməl etməməsi təəssüf doğurur.
AY Partiya həyatına təhlükə yarandığı dönəmdə Abbas Lisaniyə qarşı insani, islami, hüquqi dəyərlərin tapdanmasına etiraz edir və rəsmi Tehranı repressiv addımlara son qoymağa, səhhətindəki problemlərin ağırlıq dərəcəsini nəzərə alaraq onu ailəsinin seçdiyi həbsxanada müalicəsinə şərait yaratmağa çağırır. Bununla yanaşı vurğulamağı vacib sayırıq ki, Abbas Lisaninin xəstəliyə dövlət həbsxanasında tutulduğu, buna görə məsuliyyətin birbaşa rəsmi orqanların üzərinə düşdüyünü nəzərə alınaraq, onun xəstəxanaya köçürülməsi, müalicəsi üzrə bütün xərcləri dövlət ödəməlidir.
Düşünürük ki, belə bir humanist addım İran İslam Respublikasının regional sülhə töhfəsi ola bilər.
AY Partiya eyni zamanda dünya azərbaycanlılarını Güney Azərbaycanın səsi olan Abbas Lisaninin həyati təhlükə ilə üz-üzə olduğunu nəzərə alaraq problemə səssiz qalmamağa, rəsmi Tehrandan vətəndaşlarının sağlamlıq durumu ilə bağlı üzərinə düşən öhdəlikləri yerinə yetirməyi tələb etməyə çağırır.
08.12.2020