Azərbaycan Yüksəliş Partiyasının 10 Dekabr – Qələbə Paradı münasibəti ilə
TƏBRİKİ
Əziz həmvətənlərimiz, Bakıda keçirilən Qələbə Paradı münasibəti ilə hər birinizi təbrik edirik!
İnanırıq ki, ən yaxın zamanda paradımız Xankəndidə keçiriləcək. Bu inancı bizə bəxş edən şəhidlərimizə rəhmət, yaralılarımıza şəfa diləyir, bütün qazilərimizə "Var olun!" deyirik. Onların şücaəti və qəhrəmanlığı nəticəsində Azərbaycan sadəcə Qafqazın deyil, bütün dünyanın onillərlə irəliyə doğru tarixi gedişini dəyişdirdi. Bu dəyişikliyin adı Türk Birliyinin qurulmasıdır.
Qələbə paradımızda biz tək olmayacayıq. Qardaş Türkiyənin Prezidenti, Ali Hərbi Komandanlığı, hökumət rəhbərləri, nəhayət canı canımızdan, qanı qanımızdan olan Türk əsgərləri bu paradda bizimlə birlikdə olacaqlar, iştirak edəcəklər. Bu Qələbə bizim ortaq qələbəmizdir.
"Türk Ordusu Azərbaycana gəlir", - deyənlərə bir daha xatırlatmaq istəyirik ki, Türk Ordusu Azərbaycana gəlmir, qayıdır! Bu qayıdış evinə qayıdışdır, öz ata-baba yurduna geri dönüşdür. Biz bir millətik, ona görə də Ordumuz da tək olmalıdır! Ordularımız iki qanaddırsa, gövdə tək olmalıdır. O da ortaq Türk Ordusudur.
Azərbaycan Yüksəliş Partiyası olaraq düşünürük ki, Azərbaycan dövlətinin rəhbərliyi Türk dövlətinin və ordusunun rəhbərliyinin Azərbaycanda olmasından səmərəli istifadə edərək ortaq razılaşmalar əsasında hərbi-siyasi paktın qurulmasına, Azərbaycanda Türkiyənin bir quru, bir hava və bir dəniz bazasının yaradılmasına çalışmalıdır. Unutmayaq ki, ölkəmizin torpaq bütünlüyü hələ tam təmin olunmayıb və bəzi qonşularımızın bizə qarşı düşməncə planları hələ də icraatdan qaldırılmayıb. Azərbaycan müstəqilliyinin təminatı Türkiyə ilə sıx ittifaqın qurulmasındadır. Bu tarixi günlərdə hər iki ölkənin rəhbərliyi fürsəti doğru dəyərləndirməli, dövlətlərimiz arasında hərbi-siyasi birliyin yaradılmasını reallaşdırmalıdırlar. Dənizdən dənizə, qitədən qitəyə birlik nədir, Dövlət nədir - o zaman görünəcək. Türk Dünyasının bütün milli qüvvələri də bizdən bunu gözləyir, çünki müstəqilliklərinin son ümidgahları Türk Birliyidir!
