Azərbaycan Yüksəliş Partiyasının 21 Azər Hərəkatının 75-ci ildönümü münasibəti ilə anım mesajı

Azərbaycan Milli Hərəkatının hər səhifəsi, hər günü bizə əzizidir. Lakin onların arasında elə bir gün var ki, bizim üçün həm sevinc, həm də kədər günüdür. O gün 12 dekabr günüdür. 1945-ci il dekabrın 12-də Azərbaycanın Güneyində Milli Firqə (Milli Hökumət) elan olunub və uzun aradan sonra yenidən milli istiqlal arzusu reallaşmağa başlayıb.
Paytaxtı Təbriz şəhəri olan Milli Hökumətin ömrü qısa olsa da, xalqın dəstəyi ilə dövlətin bir çox vacib işlərini həyata keçirməyə müvəffəq olub.
Belə ki, Təbriz Dövlət Universiteti kimi bir təhsil ocağının açılması, Azərbaycan türkcəsinin dövlət dili elan olunması, milli teatr və filarmoniyanın qurulması, kitabxanaların istifadəyə verilməsi, ən əsası isə Güney Azərbaycan Milli Ordusunun yaradılması kimi dövlət quruculuğunda əhəmiyyətli islahatlar həyata keçirilib.
Əfsuslar olsun ki, cəmi bir il ömür sürən Milli Hökumət 1946-cı ilin eyni günündə, 12 dekabr tarixində şovinist uydurma şəcərəli Pəxləvi rejimi tərəfindən işğala məruz qalaraq, süquta uğradılıb. Azadlığı az da olsa, dadan Güneyli soydaşlarımız bu işğala boyun əyməyib, sayı və gücü dəfələrlə üstün olan düşmənlə savaşaraq qəhramanlıq dastanı yazıblar.
Milli Hökumətə dəstək sözü verib sözünü tutmayan SSRİ kimi ölkələr isə soydaşlaırmızı yalın əl ilə meydanda tək qoyub xəyanət eləyib. Nə yeni nəsillər, nə də tarix istər xainləri, istər şovinist şah rejimini, istərsə də onların əməllərini unudacaq, bağışlayacaq.
21 Azər Hərəkatı şübhəsiz ki, Azərbaycan Milli İstiqlal Mübarizəsinin növbəti mərhələsi və tərkib hissəsi kimi başa düşülməlidir. Xalqımızın müstəqillik uğrunda apardığı mübarizənin coğrafiyası və xronologiyası müxtəlif ola bilər. Bu əsla bizi çaşdırmamalıdır. Onların hamısı eyni milli-siyasi arzu, hədəf istiqamətində - Milli Azadlıq hədəfi istiqamətində gedən, eyni qaynaqdan – Milli ruh və iradə qaynağından qidalanan hərəkatın parçalarıdır.
Güneyli soydaşlarımızın 21 azər Hərəkatından öncə də, sonra da mübarizə davam etdirilib. Lakin hamısı qəddarcasına yatırdılıb, dağıdılıb. Bu gün isə artıq yenidən doğuş yaşanır Güneydə. İndi əsas məsələ Güneyli-Quzeyli bütöv bir hərəkatın vüsət alaraq xalqımızın haqqı olan istiqlala qovuşmaqdır.
AY Partiyası olaraq bu gün 1945-ci ildə qurulan Milli Hökumətimizi qürur və fəxr hissi ilə yad edirik. Başda Seyid Cəfər Pişəvəri olmaqla, Güney Azərbaycanın azadlığı uğrunda canından keçən bütün qəhramanlarımızın əziz xatırəsi qarşısında baş əyirik. Əmin olduğumuzu bildiririk ki, bu iş 1946-cı ildə bitməyib. İstiqlal və müstəqillik millətimizin halal haqqıdır. Heç bir qüvvə haqqımızı almağa əngəl ola bilməyəcək.
Yaşasın 21 Azər Hərəkatı!
Var olsun o taylı-bu taylı millətimiz!
Milli İstiqlal yolumuz açıq olsun!