Azərbaycan Yüksəliş Partiyasının
Rusiyanın Azərbaycandan aqrar məhsulların idxalına qadağa qərarına etiraz
BƏYANATI
Rusiyanın "Rosselxoznadzor" qurumu dekabrın 10-dan etibarən "zərərvericilərin müəyyənləşdirilməsi" səbəbindən Azərbaycandan pomidor və alma idxalını qadağan edib. Bundan əlavə, qurum Azərbaycan məhsullarının Rusiyaya idxalı üçün xarakterik olmayan lojistik sxemləri də qeyd edib. Bunların hər biri şişirtməli və gülməli səbəbdir.
Aydın məsələdir ki, bunlar səbəb yox, bəhanədir.
Rusiyanın bu qurumu sadəcə Azərbaycan ilə kifayətlənməyib, siyahıya Özbəkistanı və Türkiyəni (!) də əlavə edib. Bir də Ermənistanı qoşub. Bir tək fərq ondadır ki, onlara alma deyil, bibər qadağası gətirib.
Biz tam məsuliyyətimizlə deyə bilərik ki, bu, qərəzli, siyasi səbəbləri heç də dərində yatmayan, ikili münasibətlərimizə zərər gətirəcək addımdır. Rusiyanın birdən-birə üç Türk dövlətinin kənd təsərrüfatının əsas ixrac məhsullarından olan pomidora, almaya və bibərə idxal qadağası tətbiq etməsi bu ölkədə antitürk meyllərinin arttığının sübutudur.
Görünür, bəziləri hələ də Ermənistanın Azərbaycana qarşı iyul ayında Tovuz istiqamətində keçirməyə cəhd etdiyi təxribatın nəticəsində “yediyi” dərsin intiqamını almaq fikrindədir. Güman ki, həmin günlərdə Ermənistandan gələn kənd təsərrüfatı məhsullarının alınmamasını özlərinə qarşı meydan oxuma kimi başa düşənlər indi Rusiyanın "Rosselxoznadzor" qurumunun əli ilə bizdən qisas almağa çalışırlar.
Rusiya bu addımı ilə bütün ticari əxlaq normalarına hörmətsizliyini bir daha nümayiş etdirmiş oldu. Əvvəla, bu addımı atacağına dair işarələr vermədi. Daha əvvəl məlumat verdiyinə dair bəyanatını isə bütün ölkələr təkzib etdi.
İkincisi, Rusiya ən azından bu məsələ ilə əlaqədar ixracatçı ölkələrə sanitar heyət göndərə və məsələni yerində tədqiq edə bilərdi. O bunu da etmədi və məsələni bir həmlə ilə bağladı. Nəhayət, Rusiya Ermənistanı da bu siyahıya qoşmaqla, bizlərə, Türk dövlətlərinə hörmətsizlik edir. Çünki həm Türkiyə, həm Özbəkistan, həm də Azərbaycan ancaq öz torpaqlarında kənd təsərrüfatı məhsullarının yetişdirilməsi ilə məşğuldur. Ermənistanın aqrar fəaliyyətə yararlı ərazilərinin əksəriyyəti isə dünənə qədər işğal altındakı Azərbaycan torpaqlarında, Qarabağda yerləşirdi. Yəni, Qarabağ var idi, pomidor da var idi, Qarabağ getdi, pomidor da qurtardı.
AY Partiyası olaraq, Azərbaycanın hər zaman bütün ölkələrlə, o cümlədən Rusiya ilə qarşılıqlı mənfəətə əsaslanan siyasət yeritdiyini əsas götürərək, Rusiyanın Azərbaycana qarşı tətbiq etdiyi qadağaları qərəzli sayırıq və "Rosselxoznadzor"un qərarına etirazımızı bildirik.
Bununla əlaqədar Azərbaycanın müvafiq qurumlarından tələb edirik ki, Rusiyadan Azərbaycana idxal olunan mal və məhsulların müxtəlif parametrlərə görə vəziyyəti yenidən yoxlanılsın, hər birinin ciddi analizləri aparılsın və tapılan zərərli maddələrə uyğun olaraq idxal qadağası tədbiq edilsin.
Əlavə olaraq, hökumətimizə təklif edirik ki, Azərbaycan Kənd Təsərrüfatı Nazirliyi ilə Türk dövlətlərinin əlaqədar qurumları arasında Qaynar Xətt və Ortaq Masa qurulması üçün təcili danışıqlara başlanılsın, gələcəkdə Ortaq İxracat Platformasının qurulması ideyası gözdən keçirilsin.
Bakı, 11.12.2020