Azərbaycan Yüksəliş Partiyasının
1-ci Qurultay iştirakçılarının Azərbaycan xalqına
MÜRACİƏTİ
Müraciət Yüksəliş Partiyasının 06.12.2020-ci il tarixli Təsis Qurultayında qəbul edilmişdir.
Əziz həmvətənlərimiz,
Azərbaycanda milli dövlət quruculuğunun çox vacib və tayı-bərabəri olmayan mərhələsinin yaşandığı bir zamanın hamımız şahidiyik. Sevinc gözyaçlarının qələbə duyğusuna qarışdığı bu tarixi günləri bizə bəhş edən bütün şəhidlərimizə Ulu Tanrıdan rəhmət, yaralılarımıza şəfa, əsgərlərimizə sağlıq diləyirik.
Hərb meydanında qəhramanlıq tarixi yazan millətimizin bundan sonra müşkül işi asan, uzun yolu qısa, ağır yükü yüngül olacaq. Biz xalq olaraq qarşımızda duran yeganə həyati məsələmizi – Qarabağ münaqişəsini zəfərlə həll elədik. Bundan sonra əsas istiqamət ədalətli, açıq, qabaqcıl elmə və texnikaya sahib, müasir təhsilin və elmi düşüncənin dominant olduğu, siyasi dözüm və əməkdaşlıq müstəvisində rəqabət aparan cəmiyyətin qurulmasına nail olmaqdır.
Ən vacib məsələlərdən biri müharibəsonrası dövrdə qələbə eyforiyasına qapılmadan, soyuq təfəkkürlə və düzgün hesablamalarla Azərbaycana lazım olan iqtisadi-siyasi inkişaf yolunun xəritəsini çizməkdir. Klassiklərimizin xalqımızın bir hissəsində bəyənmədiyi müştəbehlik, özündənrazılıq, öz yanlışlarını inkaretmə kimi xüsusiyyətlərimizdən qurtullub, yerinə əzmkar şəkildə gündəlik çalışma ruhuna sarılmalıyıq. Müharibənin ön cəbhəsində göstərdiyimiz şücaətin yerini indi mülki həyatda yorulmadan həm öz üzərimizdə, həm də problemlərimizin həlli istiqamətində işləməyimiz olmalıdır.
Belə işlərdən biri siyiasi müstəvidə vətəndaşlarımızın birliyini təmin edərək cəmiyyətin bir çox problemlərinə çözüm gətirmək işidir. Şübhəsiz, bunun əsas yolu yeni partiyaların qurulmasından keçir. Biz yeni partiya deyərkən cəmiyyətə yeni ruh, yeni baxış, yeni yanaşma gətirməyi nəzərdə tuturuq. Əvvəlki siyasi birliklərin müsbət tərəfləri olsa da, bir-biriləri ilə ittiham, nifaq, intriqa, hədəqorxu ritorikası ilə münasibət qurduqlarından dolayı Milli Azadlıq Hərəkatının ilk illərində əldə olunan kövrək milli birliyimizi dağıtmış, insanlarımızda siyasi fəaliyyətə və ümumilə siyasətə ikrah hissi oyandırmışdılar. Bunun üstünə bir də hökumət nümayəndələrinin azadfikirli insanlarımıza, demokratik cəmiyyətin tərəfdarı olan siyasi və ictimai birliklərimizə qarşı apardıqları qorxutma, qadağa, cəzalandırma tədbirlərini də əlavə eləsək görərik ki, siyiasi müstəvidə Azərbaycan çox acınacaqlı yerdədir.
Biz nə istəyirik? İstəyirik ki, analar layəqətli müavinətlər alsınlar, təqaüdçülərin dərmanları sığorta sistemi tərəfindən qarşılansın, müəllimlər və həkimlərə dövlət qulluqçusu statusu verilsin, Dövlət Qulluğu haqqında Qanun inkişaf etmiş qabaqcıl ölkələrin qanunlarına uyğun olaraq yenidən tərtib olunsun, işadamlarımız bürokratik əngəllərdən qurtulsunlar, gömrük rüsumları soyğunçu mahiyyətdə olmasın, kadr siyasətində milli idraklı və ruhlu peşəkar insanlara üstünlük verilsin, parçalanmış Azərbaycanın respublikamızdankənar hissələrində yaşayan soydaşlarımıza dilimizdəki kitabları dövlətimizin hesabına göndərə bilək.
Bunun üçün biz bir yola çıxırıq. Yol gedənindir, deyiblər. Heç kim bu yolun inhisarçısı deyil. Bu yolun yoldaşı olmaq ağır da olsa, şərəflidir. Biz həm də bir-birimizin yoldaşı olmalıyıq. Çünki, ancaq bu şəkildə layiq oduğumuz həyat tərzini qura biləcəyimizi düşünürük.
Əziz soydaşlarımız, indi seçim bizimdir. Seçən də bizik, seçilmişlər də. Biz hamımız qərar verməliyik: gözümüzün qarşısında cərayan edən proseslərin obyektimi olaq, yoxsa həmin proseslərin gedişatına öz azad iradəmizlə yön verən subyektimi?
Bu minvalla, Yüksəliş Partiyasının hər bir qurucu üzvü sizin hər birinizi partiyamıza qoşulmağa dəvət edir. Vətənimizin bu günü, millətimizin gələcəyi, müstəqilliyimizin əbədiyyəti naminə birləşək, güclənək, yüksələk!
Eşq olsun millətimizə!
Yaşasın Yüksələn Azərbaycan!